"თბილისში ამერიკის საელჩოს წინააღმდეგ განხორციელებულ ტერაქტში რუსეთის მონაწილეობის შესახებ გაკეთებულ განცხადებებს საერთაშორისო პოლიტიკაში დიდი დიპლომატიური ტალღა მოჰყვა.ის მოსკოვთან „გადატვირთვის" ნალოლიავებ პოლიტიკას საფრთხეს უქმნის. აღნიშნული ინციდენტი ხაზს უსვამს კავკასიაში არსებულ არასტაბლურობას, თუმცა, ამავდროულად, ის რეგიონში რუსეთის ხანგრძლივი მოღვაწეობის ხელწერას ადასტურებს", - წერს გამოცემა World Politics Review.
სტატიის ავტორის, მაიკლ ჩეჩირეს აზრით, აფეთქებების ზუსტ გარემობებთან დაკავშირებით ეჭვები კვლავ ჩნდება, მით უფრო მაშინ, როდესაც ბოლო რამდენიმე წლის განმავლობაში ამერიკის სპეცსამსახურების რეპუტაცია სერიოზულად შეილახა.
"უფრო მნიშვნელოვანი კითხვა ის არის, თუ რაში სჭირდება ეს რუსეთს? რას მიიღებენ ისინი თბილისში საელჩოსთან ბომბის აფეთქებით?" კარგი კითხვაა. ერთი შეხედვით, ამერიკის საკუთრების წინააღმდეგ ტერაქტების მხარდაჭერაში სარგებელი ცოტაა, თუკი რუსული ინტერესებისთვის მხილების შედეგებს გავითვალისწინებთ.
გამოცემის შეფასებით, ამერიკის საელჩოზე თავდასხმა, როგორც ჩანს, ამერიკელებზე მეტად, საქართველოს მთავრობისთვის განკუთვნილი გზავნილი იყო.
"აფეთქების სიახლოვე საელჩოსთან ადასტურებს იმას, რომ ბომბები ამერიკელებისთვის მხოლოდ მინიშნება იყო და იმის ხაზგასმის მცდელობა, რომ საქართველო ამერიკის ოფიციალური პირებისთვის არასტაბილური ქვეყანაა. აფეთქების მიზანს ამერიკული საკუთრებისთვის ზიანის მიყენება არ წარმოადგენდა", - აღნიშნულია სტატიაში.
მასალის ავტორი წერს, რომ თუკი რეგიონში რუსეთის ისტორიას გავითვალისწინებთ, რეალურია შესაძლებლობა, რომ მოსკოვი საელჩოსთან მომხდარ ტერაქტში ჩართულია. თუმცა დასძენს, რომ "საქართველოს მთავრობის ტენდენცია - ყველაფერში რუსეთი დაადანაშაულოს - ხშირად მართლაც გადაჭარბებულია".
"ეს, რა თქმა უნდა, არ ნიშნავს იმას, რომ თბილისის ბრალდებები ყოველთვის უსაფუძვლოა. ეს არ ნიშნავს იმას, რომ საქართველოს მთავრობა უცოდველია ან არ შეიძლება არასწორი ინფორმაცია ჰქონდეს. ეს იმას ნიშნავს, რომ საქართველოში დემოკრატიის ხარვეზებისა და მისი დაძაბული სტილის მიუხედავად, თბილისის წუხილის გაგება ქვეყნის უსაფრთხოებასთან დაკავშირებული საკითხებით, შესაძლებელია და რომ საქართველოს წინააღმდეგ რუსეთის უკვე დადასტურებული მავნე საქმიანობის ფონზე, ისეთი სერიოზული ბრალდებების უგულებელყოფა, როგორიცაა ამერიკის საელჩოს შენობასთან მომხდარი აფეთქება, არ შეიძლება", - აღნიშნავს ჟურნალისტი.
