კიევის მერი ვიტალი კლიჩკო უარყოფს ბრალდებებს, უკრაინის დედაქალაქი გათბობის სეზონისთვის სათანადოდ ვერ უზრუნველყვეს. მისი განცხადებით, ეს ადგილობრივი თვითმმართველობის განადგურების მცდელობის ნაწილია.
ამის შესახებ კიევის საქალაქო სახელმწიფო ადმინისტრაციის ხელმძღვანელმა Telegram-ზე დაწერა.
„ვრცელდება უსაფუძვლო ბრალდებები, თითქოს გათბობის სეზონის ჩაშლას ვაპირებთ. ამ ინფორმაციას ცენტრალურ ხელისუფლებასთან დაკავშირებული რესურსები ავრცელებენ“, - აცხადებს კლიჩკო.
მისი თქმით, ადგილობრივი თვითმმართველობის განადგურებას ცდილობენ და თემების ხელმძღვანელებს შეთხზული მიზეზებით თანამდებობებიდან ათავისუფლებენ.
კლიჩკოს განცხადებით, ის უკიდურესად რთულ პირობებში ყველაფერს აკეთებს, რათა კიეველების ნდობა გაამართლოს და მტრის მუდმივი გამანადგურებელი თავდასხმების მიუხედავად, ქალაქის ფუნქციონირება უზრუნველყოს. ამასთან, მერის თქმით, ის საჰაერო თავდაცვაზე პასუხისმგებელი ვერ იქნება.
"ადგილობრივი თვითმმართველობის განადგურებას ცდილობენ და არა მხოლოდ კიევში - თემების ხელმძღვანელების შეთხზული მიზეზებით თანამდებობებიდან ჩამოშორების გზით.
ხალხმა მე ამირჩია და ვმუშაობ, უკიდურესად რთულ პირობებში ყველაფერს ვაკეთებ, რაც შემიძლია, რათა კიეველების ნდობა გავამართლო და უზრუნველვყო ქალაქის ფუნქციონირება მტრის მუდმივი, გამანადგურებელი თავდასხმების პირობებში“, - წერს კლიჩკო.
კლიჩკოს განცხადება მას შემდეგ გავრცელდა, რაც უკრაინის უმაღლესი რადას დეპუტატებმა მხარი დაუჭირეს ფრაქცია „ხალხის მსახურის“ წევრის, მარიანა ბეზუგლაიას წინადადებას, რომ კიევის მერი პარლამენტის სხდომაზე დაიბარონ.
კლიჩკოს პრესმდივანმა ოქსანა ზინოვიევამ განაცხადა, რომ მერს ამ დროისთვის ოფიციალური მოწვევა არ მიუღია.
„ოფიციალური მოწვევა ჯერ არ მიგვიღია. დეპუტატებისგან გავიგეთ, რომ ამ საკითხს მხარი დაუჭირეს. როგორც კი მოწვევას მივიღებთ, წავალთ“, - განაცხადა ზინოვიევამ.
