სომხეთის საგარეო საქმეთა მინისტრის, არარატ მირზოიანის განცხადებით, ამ ეტაპზე სომხეთმა ევროკავშირთან თბილი ურთიერთობების განვითარებაზე უნდა გაამახვილოს ყურადღება, ხოლო მომავალში გადაწყვიტოს, რა იქნება ქვეყნის მიზანი ევროკავშირთან დაახლოების გზაზე.
ამის შესახებ მირზოიანმა ვარშავის უსაფრთხოების ფორუმზე განაცხადა.
„ვფიქრობ, ეს არავინ იცის - არც სომხეთმა, არც ევროკავშირმა და არც ამ გაერთიანების წევრმა ქვეყნებმა“, - აღნიშნა მინისტრმა სომხეთის ევროკავშირში გაწევრიანების პერსპექტივაზე საუბრისას.
მისი თქმით, სომხეთსა და ევროკავშირს შორის ურთიერთობები დღეს უპრეცედენტოდ ღრმა და მჭიდროა და თანამშრომლობის სხვადასხვა სფეროს მოიცავს. ეს ეხება არა მხოლოდ პოლიტიკურ დიალოგს, ეკონომიკურ თანამშრომლობასა და ვაჭრობის ხელშეწყობას, არამედ უსაფრთხოებას, საგარეო პოლიტიკასა და სხვა მიმართულებებსაც.
მირზოიანის განცხადებით, სომხეთში ევროკავშირში გაწევრიანების საკითხზე სერიოზული მსჯელობა მხოლოდ ახლახან დაიწყო და ამ თემაზე ფართო საზოგადოებრივი დისკუსია ჯერ არ გამართულა, მიუხედავად იმისა, რომ ევროკავშირში გაწევრიანების პროცესის დაწყების შესახებ კანონი 2025 წლის მარტში მიიღეს.
„არ ვარ დარწმუნებული, რომ ევროკავშირმა უკვე მიიღო გადაწყვეტილება, ხვალვე მიიღოს სომხეთი სრულუფლებიან წევრად, თუნდაც სომხეთმა თანხმობა განაცხადოს“, - განაცხადა საგარეო საქმეთა მინისტრმა.
ევროკავშირთან ურთიერთობებზე საუბრისას მირზოიანმა რუსეთთან კავშირებიც ახსენა. მისი თქმით, სომხეთს რუსეთთან ისტორიულად ახლო ურთიერთობები აქვს და ეს კავშირები კვლავ მტკიცეა.
„ისტორიულად ძალიან ახლოს ვიყავით და ახლაც ძალიან მტკიცე კავშირები გვაქვს, თუმცა შესაძლო რეაქციების მართვაა საჭირო. ვგულისხმობ იმას, რომ არავის სურს მსოფლიოში ახალი მტრების გაჩენა. არავის, მათ შორის არც რომელიმე მესამე მხარისთვის, ზიანის მიყენებას არ ვაპირებთ“,- აღნიშნა მან.
მირზოიანმა საქართველოზეც ისაუბრა და განაცხადა, რომ ვითარება უფრო მარტივი იქნებოდა, ქვეყანას ევროკავშირში ინტეგრაციის გზა რომ გაეგრძელებინა. მისი შეფასებით, ამას მნიშვნელოვანი ცვლილებები მოჰყვებოდა და დღევანდელ ვითარებაში მხარეებს შორის საუბრის ბუნებასაც შეცვლიდა.
მინისტრის თქმით, ამ ეტაპზე სომხეთიც, ევროკავშირიც და მისი წევრი ქვეყნებიც არსებული პროცესით ტკბებიან.
„მოდით, გავაგრძელოთ ეს თბილი ურთიერთობები, გავხსნათ ახალი შესაძლებლობები და შემდეგ, მომავალში, რაღაც მომენტში ერთად განვიხილოთ, დავქორწინდებით თუ არა“, - დასძინა მირზოიანმა.
