„ახალი მემარჯვენეები" ხელისუფლებისგან ხორცის ბაზრის დაუყოვნებლივ დერეგულაციასა და დემონოპოლიზაციას მოითხოვენ. ამის შესახებ პარტიის ოფისში გამართულ ბრიფინგზე „მემარჯვენეების" ლიდერმა დავით გამყრელიძემ განაცხადა.
მისი თქმით, სურსათის უვნებლობის უზრუნველყოფის საბაბით საქართველოს პარლამენტის მიერ სპეციალურად მომზადებულმა საკანონმდებლო ბაზამ და ცხოველების სახორცედ დაკვლისა და მათი რეალიზაციისთვის სურსათის ეროვნული სააგენტოს მიერ შემოღებულმა რეგულაციებმა გამოიწვია ის, რომ ამ ბაზარზე მომსახურებას მხოლოდ 2 ლიცენზირებული სასაკლაო ახორციელებს, რის შედეგადაც ხორცის ფასმა კატასტროფულ ნიშნულს მიაღწია. გამყრელიძის განმარტებით, ანალოგიური სიტუაციაა არა მარტო ხორცის ბაზარზე, რამაც გამოიწვია, ის რომ ლარის შემოღებიდან პირველად საქართველოში ინფლაციის რეკორდული მაჩვენებელი - 14.3 % დაფიქსირდა.
„ახალი მემარჯვენეები მივიჩნევთ, რომ ხელისუფლების ქმედება ქვეყანაში ინფლაციის კატასტროფულ ზრდასთან მიმართებაში უპასუხისმგებლოა და კიდევ ერთხელ მიუთითებს მთავრობის უუნარობაზე აწარმოოს სწორი ეკონომიკური პოლიტიკა, რომელიც საქართველოს ეკონომიკის გაძლიერებას და სიღარიბის დაძლევას უზრუნველყოფს. რამდენიმე თვის წინ ინფლაციის მაჩვენებლის 13.7 პროცენტიან ნიშნულზე დაფიქსირებასთან დაკავშირებით „ახალმა მემარჯვენეებმა" ხელისუფლებას შევთავაზეთ 5 პუნქტისგან შემდგარი წინადადებები, რომელიც ჩვენი და ეკონომიკის ექსპერტთა დიდი ნაწილის აზრით ეფექტურად უზრუნველყოფდა ინფლაციის და ფასების ზრდის მასშტაბების შემცირებას. პირველ რიგში მემარჯვენეები საჭიროდ ვთვლიდით და დღესაც ვთვლით ბიუჯეტის ხარჯვითი ნაწილის შემცირებას, ხელოვნული მონოპოლიების აღკვეთისთვის ხელისუფლების მიერ განსაკუთრებული ზომების მიღებას, ასევე, ეკონომიკური აქტივობის ზრდისთვის ისეთი გადასახადების შემცირებას, როგორიც არის დღგ და აქციზი, ბიზნესზე ტერორის მოსპობას და სასოფლო-სამეურნეო პროდუქციის წარმოების სტიმულირების მიზნით ამ დარგში განხორციელებული ინვესტიციების, წარმოების და გადამუშავების უახლოესი 5 წლის განმავლობაში ყოველგვარი სახელმწიფო გადასახადისგან გათავისუფლებას", - განაცხადა გამყრელიძემ.
გამყრელიძის თქმით, ხელისუფლების უმოქმედობის გამო, ეს წინადადებები დღესაც ისეთივე აქტუალურია, როგორც რამდენიმე თვის წინ.
„მოვუწოდებთ ხელისუფლებას დაუყოვნებლივ მიიღოს ზომები ხორცის ბაზრის დერეგულაციისთვის, რაც ავტომატურად გამოიწვევს ამ სეგმენტში დემონოპოლიზაციას და ფასების შემცირებას. ამავდროულად, ხელისუფლებამ უნდა დაიწყოს ზოგადად ქვეყანაში ინფლაციის და ფასების ზრდის გამომწვევი მიზეზების ანალიზი და იმ ღონისძიებების განხორციელება, რომელიც „ახალი მემარჯვენეების" ხუთპუნქტიან შეთავაზებებში იყო ჩამოყალიბებული", - აღნიშნა გამყრელიძემ.
