სებ-ის ინფორმაციით, 2010 წლის განმავლობაში კომერციულმა ბანკებმა მთლიანობაში შეისყიდეს 6.738 მლნ, ხოლო გაყიდეს 6.487 მლნ აშშ დოლარი. ევროთი ვაჭრობის მაჩვენებლები იმავე პერიოდში შედარებით მოკრძალებულია: 1.379 მლნ და 1.372 მლნ ევრო შესაბამისად. სავალუტო აუქციონებზე, რომელიც საქართველოს ეროვნული ბანკისთვის ბანკთაშორის სავალუტო ბაზარზე ინტერვენციის ერთადერთი საშუალებაა, წლიურმა ბრუნვამ 457.2 მლნ აშშ დოლარი შეადგინა და 2009 წლის ჯამურ ინტერვენციას თითქმის 45 მლნ აშშ დოლარით ჩამორჩება. ამასთან, საანგარიშო წლის პირველი ნახევარი ძირითადად ხასიათდებოდა საქართველოს ეროვნული ბანკის მიერ უცხოური ვალუტის გაყიდვის ოპერაციებით, ხოლო მეორე ნახევარი კი შესყიდვის ოპერაციებით სავალუტო ბაზარზე ბანკთაშორისი ოპერაციები 2009 წლის შემდეგ „ბლუმბერგი"-ს საერთაშორისო სავაჭრო სისტემის მეშვეობით ხორციელდებოდა. სისტემამ თავი დაიმკვიდრა, როგორც საიმედო, თანამედროვე ელექტრონულმა სავაჭრო პლატფორმამ, რომლის მეშვეობითაც ბანკები მარტივად და უსაფრთხოდ ახორციელებენ სავალუტო გარიგებებს. 2010 წლის განმავლობაში ბანკთაშორისი სავალუტო გარიგებების 97 პროცენტი სწორედ „ბლუმბერგის" სავაჭრო სისტემაში იქნა განხორ ციელებული, გაიზარდა ბანკთაშორისი სავალუტო გარიგებების რაოდენობა და მოცულობა. საქართველოს ეროვნული ბანკის მონაწილეობა კვლავინდებურად პერიოდული სავალუტო აუქციონებით შემოიფარგლებოდა, რომელიც ასევე „ბლუმბერგის" სავაჭრო სისტემის მეშვეობით ხორციელდებოდა. ამასთან, 2010 წელს „ბლუმბერგის" კომპანიამ საქართველოს ბაზრისათვის არსებითად დახვეწა სავალუტო აუქციონისთვის გამოყენებული პროგრამული უზრუნველყოფა.
სებ-ის 2010 წლის ანგარიშში ნათქვამია, რომ კომერციულ ბანკებსა და სხვა სუბიექტებს შორის ვალუტით ვაჭრობაში ტრადიციულად მნიშვნელოვანი წილი უკავია იურიდიული პირებისგან შესყიდვისა და გაყიდვის ოპერაციებს (მოცულობის 46.5 პროცენტი და 51.9 პროცენტი შესაბამისად). ცალკე აღნიშვნის ღირსია უშუალოდ კომერციულ ბანკებს შორის დოლარი-ლარის წყვილზე დადებული გარიგებები, რომლებიც წამყვან როლს თამაშობენ ყოველდღიური ოფიციალური გაცვლითი კურსის განსაზღვრაში. კერძოდ, სხვა ქვეყნების ვალუტების მიმართ ლარის ოფიციალური გაცვლითი კურსის დასადგენად საქართველოს
ეროვნული ბანკი ითვალისწინებს „ბლუმბერგის" სავაჭრო სისტემაში რეგისტრირებულ გარიგებებს. ოფიციალური გაცვლითი კურსის გასაანგარიშებლად გამოიყენება მხოლოდ აშშ დოლარი-ლარის წყვილზე დადებულ სპოტ-გარიგებათა მიხედვით გამოთვლილი საშუალო შეწონილი მნიშვნელობა. სხვა ვალუტების მიმართ კურსი განისაზღვრება საერთაშორისო ბაზრებზე ან ემიტენტი ქვეყნის შიდა სავალუტო ბაზარზე არსებული კურსების კროს-კურსული გადაანგარიშების საფუძველზე. სავაჭრო სისტემაში 2010 წლის განმავლობაში აშშ დოლარი-ლარის სავალუტო წყვილზე 2671 გარიგება დაიდო და მათ შედეგად განხორციელებულმა ბრუნვამ 906.3 მლნ აშშ დოლარი შეადგინა, რაც ბანკთაშორის სავალუტო ვაჭრობის მთლიანი მოცულობის დაახლოებით 80 პროცენტია. შედარებისთვის, 2009 წელს აღნიშნული მაჩვენებელი გაცილებით ნაკლები იყო _ 69.6 პროცენტი. ამასთან, ვაჭრობის ინტენსივობა გაიზარდა საშუალოდ 5-6 გარიგებიდან 7-8 გარიგებამდე დღეში. ყოველივე ეს ნაწილობრივ მიანიშნებს იმ ფაქტზე, რომ ბანკთაშორისი სავალუტო ბაზარი იძენს მეტ მნიშვნელობას ვალუტით ვაჭრობის მხრივ. ეს ტენდენცია სრულ თანხმობაშია საქართველოს ეროვნული ბანკის მიზანთან, საბაზრო მექანიზმს მიენიჭოს დომინანტური როლი კურსის განსაზღვრისას.
2010 წლის ანგარიშში ნათქვამია, რომ სავალუტო აუქციონების ამოქმედების შემდეგ მნიშვნელოვნად შემცირდა სავალუტო ბაზარზე ეროვნული ბანკის მონაწილეობა, გაიზარდა გაცვლითი კურსის მოქნილობა. გაცვლითი კურსი მოკლევადიან პერიოდში გახდა არაპროგნოზირებადი, რაც მნიშვნელოვანია ბაზარზე სპეკულაციური
მოლოდინების შემცირებისათვის. სავალუტო ბაზრის შემდგომი განვითარებისათვის აუცილებელია სავალუტო რისკის დაზღვევის ინსტრუმენტების ბაზრის განვითარება. დღეისათვის სავალუტო
რისკის დაზღვევის ინსტრუმენტების, ფინანსური წარმოებულების, ბაზრის განვითარების დაბალი დონის მიზეზი ბაზარზე მომხმარებლების მხრიდან მოთხოვნის ნაკლებობაა. ამდენად ფინანსური წარმოებულების ბაზრის განვითარებისათვის აუცილებელია ბაზრის მონაწილეთა შორის რისკის დაზღვევის ინსტრუმენტების გამოყენების შესაძლებლობების შესახებ ინფორმაციის გავრცელება, რაშიც მნიშვნელოვანი როლი ეროვნულ ბანკთან ერთად კომერციულ ბანკებსაც ენიჭებათ. მომავალი წლებისათვის ეროვნული ბანკის მიზანი სავალუტო ფორვარდული ბაზრის განვითარება იქნება.