დღეს, 11 ივნისს, 18:00 საათზე ყოფილი საბაგიროს შენობაში (რუსთაველის გამზირი #52) გაიმართება ზაფხულის ტურისტული სეზონის გახსნის ღონისძიება, რომლის ფარგლებშიც მოეწყობა საქართველოს ტურისტული პოტენციალის ამსახველი ფოტოგამოფენა. ღონისძიებას დაესწრება საქართველოს ეკონომიკისა და მდგრადი განვითარების მინისტრი ვერა ქობალია.
პროექტის ძირითად მიზანს წარმოადგენს საქართველოში ზაფხულის სეზონის ტურისტული აქტივობების პოპულარიზაცია, არსებული რესურსის გაცნობა და ზაფხულის განმავლობაში საქართველოს სხვადასხვა კუთხეში მოგზაურობის სურვილის გაჩენა.
საღამოს მასპინძელი საქართველოს ტურიზმის ეროვნული საგენტოს თავმჯდომარე მაია სიდამონიძე მიესალმება დამსწრე საზოგადოებას და ოფიციალურად გახსნის ზაფხულის ტურისტულ სეზონს. იგი მოწვეულ სტუმრებს საქართველოს ტურიზმის სფეროში მიღწეული წარმატებების, ზაფხულის ტურისტული აქტივობების შესახებ უამბობს და გააცნობს ამავე სფეროს სამომავლო გეგმებს.
Travel Channel-ი თავისი ახალი სატელევიზიო გადაცემისათვის ESSENTIAL აპირებს კიდევ ერთი სერიის გადაღებას. ეს გადაცემა ორიენტირებულია, რომ აღმოაჩინოს და მაყურებელს გააცნოს ის საუკეთესო საშუალებები და დასასვენებელი ადგილები, სადაც თითოეული მათგანი შესძლებს დროის განუმეორებლად გატარებას და საუცხოოდ დასვენებას. ამჯერად ამ არაჩვეულებრივი სატელევიზიო გადაცემის კიდევ ერთი სერიის გადაღება, რომელსაც Essential Georgia ერქმევა - საქართველოში იგეგმება.