საქართველოს ეკონომიკისა და მდგრადი განვითარების მინისტრის 2011 წლის 20 მაისის №1-1/769 ბრძანებით, ბათუმში, ბაგრატიონის ქუჩაზე გამავალი საავტომობილო გზის გაგრძელება-გაფართოების მშენებლობა ჩაითვალა აუცილებელ საზოგადოებრივ საჭიროებად. ყველა მესაკუთრის ქონება - რომელიც ფლობს ფართს ბათუმში, ბაგრატიონის ქუჩაზე გამავალი საავტომობილო გზის გაგრძელება-გაფართოების მშენებლობისთვის საჭირო ტერიტორიაზე - ექვემდებარება ექსპროპრიაციას.

ბოლო ხუთი წლის განმავლობაში ქ. ბათუმში მშენებლობის ტემპის ზრდამ წარმოშვა ახალი ქალაქთმშენებლობითი პრობლემები, რომელთაგან უმნიშვნელოვანესია საინჟინრო ინფრასტრუქტურისა და სატრანსპორტო მაგისტრალებისა თუ კვანძების განვითარება-განახლების აუცილებლობა. ბათუმში აქტიურად მიმდინარეობს ახალი გზების მშენებლობა, ასევე, არსებული სატრანსპორტო ქსელების გაგრძელება, გაფართოება-რეკონსტრუქცია. ერთ-ერთ ასეთ სატრანსპორტო კვანძს, რომლის განვითარების აუცილებლობაც არსებობს, წარმოადგენს ბაგრატიონის ქუჩის გაგრძელება-გაფართოების მშენებლობა. ამ ქუჩის მშენებლობა განხორციელებული იყო აღმაშენებლის ქუჩიდან 26 მაისის ქუჩამდე. აღნიშნულის გამო, სატრანსპორტო ნაკადი, რომელიც ქალაქიდან გასვლის მიზნით, აღმაშენებლისა და ბაგრატიონის ქუჩების კვეთიდან 26 მაისისა და ბაგრატიონის ქუჩების კვეთის მიმართულებით მოძრაობს ბაგრატიონის ქუჩაზე, იძულებულია, მოძრაობა გააგრძელოს ქალაქის ცენტრის - პუშკინისა და ჭავჭავაძის ქუჩების მიმართულებით და ქალაქიდან გავიდეს ან პუშკინის და შავშეთის ქუჩების გავლით ან/და ჭავჭავაძისა და გოგებაშვილის ქუჩების გავლით. პუშკინის, ჭავჭავაძისა და გოგებაშვილის ქუჩების გამტარუნარიანობა არის შეზღუდული, რაც ქმნის საცობებს და ირღვევა მოძრაობის უსაფრთხოება. იგივე მდგომარეობა იყო სატრანსპორტო ნაკადის უკუმიმართულებით მოძრაობისას, რასაც ემატებოდა ის, რომ სატრანსპორტო ნაკადი საბოლოოდ თავს იყრიდა ტბელ აბუსერიძის, კობალაძის, ანგისის, აეროპორტის გზატკეცილის და აღმაშენებლის ქუჩების კვეთაში არსებულ წრიულზე, რომლის გამტარუნარიანობაც ასევე შეზღუდული იყო და არსებული მდგომარეობა ქმნიდა საცობებს.

დასახელებული ქალაქმშენებლობითი პრობლემის გადაწყვეტა შესაძლებელია ბაგრატიონის ქუჩის იმდაგვარად გაგრძელება-გაფართოების მშენებლობით, რომლის შედეგად იგი ქალაქის ორ ბოლოს, ქალაქის ცენტრალური ნაწილის ავლით დააკავშირებს ერთმანეთს და ყველა ის სატრანსპორტო საშუალება, რომელიც გადის ქალაქიდან, ასევე, ყველა ის სატრანსპორტო საშუალება, რომლის სვლაგეზს წარმოადგენს ქ. ბათუმის პერიფერიული უბნები, აღარ გაივლის ქალაქის ცენტრალურ ქუჩებს, არამედ აღნიშნული მიმართულებით მოძრაობა შესაძლებელი იქნება მხოლოდ ბაგრატიონის ქუჩის გამოყენებით. გარდა აღნიშნულისა, ამ ახალი არტერიის გაჩენით მოხდება ქალაქის გადატვირთული ცენტრალური ნაწილის მთლიანად განტვირთვა საშუალო თუ მძიმე (მათ შორის სატრანზიტო) ავტოტრანსპორტისგან.

ბათუმის მერიას მიაჩნია, რომ არსებობს ბაგრატიონის ქუჩაზე გამავალი საავტომობილო გზის გაგრძელება-გაფართოების მშენებლობის აუცილებლობა. აღნიშნულის გათვალისწინებით, მერიის მიერ დაიგეგმა ბაგრატიონის ქუჩაზე გამავალი საავტომობილო გზის ორივე მიმართულებით გაგრძელების მშენებლობა.

მერიაში მიიჩნევენ, რომ პროექტის განხორციელება არის მასშტაბური, რადგან საჭირო ხდება ცალკეული პირების საკუთრებაში არსებული მიწის ნაკვეთებისა და შენობა-ნაგებობების გამოყენება, რაც აძვირებს პროექტის ღირებულებას. ბათუმის მერიის მიერ დაიგეგმა, რომ ბაგრატიონის ქუჩაზე გამავალი მთლიანი საავტომობილო გზის გაგრძელება-გაფართოების მშენებლობა განხორციელებულიყო ორ ეტაპად.

მიუხედავად ექსპროპრიაციის უფლების მინიჭებისა, აღმაშენებლის ქუჩისა და აეროპორტის გზატკეცილს შორის არსებულ ნაწილში ბაგრატიონის ქუჩაზე გამავალი საავტომობილო გზის გაგრძელება-გაფართოების მშენებლობისთვის ბათუმის მერიას ზემოხსენებული ქონებების მიმართ არ დასჭირვებია „აუცილებელი საზოგადოებრივი საჭიროებისათვის საკუთრების ჩამორთმევის წესის" შესახებ კანონით გათვალისწინებული ღონისძიებების სრულად გამოყენება, საჭირო არ გამხდარა ექსპროპრიაციის უფლების მინიჭების მოთხოვნით სასამართლოსადმი მიმართვა და შესაბამისად სასამართლო გადაწყვეტილების იძულებითი აღსრულება, რადგან ბათუმის მერიასა და აღმაშენებლის ქუჩისა და აეროპორტის გზატკეცილს შორის არსებულ ნაწილში ბაგრატიონის ქუჩაზე გამავალი საავტომობილო გზის გაგრძელება-გაფართოების მშენებლობის ზოლში მდებარე უძრავი ქონების მესაკუთრეებს შორის მიღწეული იქნა შეთანხმება და გაფორმებული იქნა საექსპროპრიაციო ქონების კომპენსაციის შესახებ შეთანხმებები.

რაც შეეხება ბაგრატიონის ქუჩაზე გამავალი საავტომობილო გზის გაგრძელება-გაფართოების მშენებლობას ბაგრატიონის, ერისთავის და გოგოლის ქუჩების გავლით, რომლის შედეგად საავტომობილო გზა სრულად გაივლის ბაგრატიონის ქუჩას, გადაკვეთს შავშეთის ქუჩას, ასევე სრულად გაივლის ერისთავის ქუჩას, გადაკვეთს მაიაკოვსკის ქუჩას, გაივლის გოგოლის ქუჩას და შეუერთდება ნონეშვილის ქუჩას, ხოლო ნონეშვილის ქუჩის გავლით საავტომობილო გზა შეუერთდება თამარ მეფის გამზირს, საამისოდ, რომ აღნიშნულ ნაწილში განხორციელდეს საავტომობილო გზის მშენებლობა, ანუ განხორციელდეს ბაგრატიონის ქუჩაზე გამავალი საავტომობილო გზის გაგრძელება-გაფართოების მშენებლობის მეორე ეტაპი, საჭიროა მისი გაგრძელება-გაფართოების მშენებლობა განხორციელდეს საჯარო რეესტრში რეგისტრირებულ ცალკეული პირების საკუთრებაში არსებულ უძრავ ქონებებზე, რომელთა ჩამორთმევაც უნდა განხორციელდეს „აუცილებელი საზოგადოებრივი საჭიროებისთვის.