მიმდინარე წელს რეგიონებში დაგეგმილი პროექტების საერთო ღირებულება 2 მილიარდ ლარს აღწევს. როგორც საქართველოს პრეზიდენტმა დღეს სამეგრელოში, გუბერნატორებთან შეხვედრისას განაცხადა, აქედან მილიარდ 355 ათასი ინფრასტრუქტურულ პროექტებზე, დანარჩენი კი გზებსა და სარკინიგზო პროექტების განხორციელებაზე იხარჯება.
„ინფრასტრუქტურული პროექტებისთვის გათვალისწინებული მილიარდ 335 ათასი ლარიდან საავტომობილო გზებზე 550 მილიონი მოდის, სარკინიგზო ინფრასტრუქტურის მოწყობაზე, რაშიც ჩქარი რკინიგზა იგულისხმება, წელს 150 მილიონი დაიხარჯება (მთლიანად 510 მილიონია გათვალისწინებული), გაერთიანებული წყალმომარაგებისთვის კი 85 მილიონია გამოყოფილი. ჩვენი მთავარი ამოცანაა, რომ წელს, მომავალ წელს და 2013-ში საქართველოში ისტორიული პროექტი უნდა განხორციელდეს - უკლებლივ ყველგან უნდა იყოს კარგი წყალსადენი, კარგი გზა და რკინიგზა, რომელიც საქართველოს ჩართავს რკინიგზების ევროპულ ქსელში", - განაცხადა სააკაშვილმა და დასძინა:
„მიუხედავად იმისა, რომ ფული იდებოდა და თითქოს ყველაფერი კეთდებოდა, წყალსადენების პრობლემის მოგვარება აქამდე იმის გამო ვერ მოხერხდა, რომ ტექნოლოგიებს ვერ ვფლობდით".
საპასუხოდ, რეგიონალური განვითარებისა და ინფრასტრუქტურის მინისტრმა რამაზ ნიკოლეიშვილმა უპასუხა, რომ რეალურად, საქართველოში პროექტირება არ ხდებოდა და თუკი პროექტი კეთდებოდა, ის რეალობასთან მიბმული არ იყო.
„2013 წლამდე უკვე დაკონტრაქტებულია ამ მიმართულებით 850 მილიონი ლარის დახარჯვა. ტენდერებიც გამოცხადებულია. ჩვენ გვაქვს კარგი პროექტები და გეგმაზომიერად მივდივართ", - განაცხადა ნიკოლეიშვილმა.
