შეზღუდული შესაძლებლობების მქონე პირთა, ხანდაზმულთა და ოჯახურ მზრუნველობამოკლებულ ბავშვთა სოციალური რეაბილიტაციის ხელშეწყობის სახელმწიფო პროგრამის აუდიტმა სისტემური ხარვეზები გამოავლინა. ამის შესახებ აღნიშნულია კონტროლის პალატის 2010 წლის ანგარიშში, რომელიც პარლამენტში უკვე შევიდა.
ანგარიშში ნათქვამია, რომ გამოვლენილი ხარვეზები ლახავს პროგრამით მოსარგებლე ინტერესებს, მომსახურების შეზღუდული ხელმისაწვდომობისა და დაბალი ხარისხის გამო. პროგრამა არ არის ორიენტირებული რეალური შედეგების მიღწევაზე.
კონტროლის პალატის დასკვნის თანახმად, 2007-2009 წლებში პროგრამები მტკიცდებოდა საბიუჯეტო წლის დაწყებიდან ხანგრძლივი დაგვიანებით, ფერხდებოდა სახელმწიფო შესყიდვები, ბენეფიციართა დაფინანსება და პროგრამით უზრუნველყოფილი სიკეთეებით სარგებლობა. აუდიტის პერიოდში აუთვისებელმა თანხამ შეადგინა 2 465,3 ათასი ლარი, რაც დაგეგმილი საბიუჯეტო ასიგნების 19%-ს შეადგენს. აღნიშნული თანხით დამატებით დაკმაყოფილდებოდა 3500-მდე ბენეფიციარი.
ბენეფიციართათვის მომსახურების შესყიდვისას არ არის ხარისხიანი მომსახურებისთვის აუცილებელი კომპონენტები და კრიტერიუმები, როგორიცაა თანამედროვე მეთოდებისა და ტექნოლოგიების გამოყენება, ინფრასტრუქტურა, სათანადო ფართი, ლიცენზია და ა.შ. რაც განაპირობებს მომსახურების და პროგრამის შედეგების დაბალ ხარისხს.
არ არსებობს შშმპ სტატუსის მქონე ბენეფიციართა ერთიანი ბაზა, არაეფექტურია ბენეფიციართა შესაბამის დაწესებულებებში ჩართვის მექანიზმი. გათვალისწინებული არ არის შშმპ-თა კატეგორია, ასაკი, ოჯახური მდგომარეობა, გეოგრაფიული ხელმისაწვდომობა და სხვა, რაც უზრუნველყოფს ობიექტური დამოკიდებულების მაღალ ხარისხს.