დღეიდან ყაზახეთის ნაციონალური ავიაკომპანია - „ეარ ასტანა" თბილისის საერთაშორისო აეროპორტიდან რეგულარული ავია რეისების შესრულებას იწყებს ალმა-ატის მიმართულებით. რეისები უახლესი Embraer 190 ტიპის თვითმფრინავით კვირაში სამჯერ - ორშაბათს, ხუთშაბათსა და შაბათს შესრულდება. ფრენის ხანგძლივობა თბილისი - ალმა ატა სამ საათსა და ორმოც წუთს გასტანს. კომფორტულ და საიმედო მომსახურებასთან ერთად, "ეარ ასტანა" მგზავრებს ალმა-ატის გავლით ისეთ ეგზოტიკურ ქალაქებში ჩაიყვანს , როგორიცაა დელი, პეკინი, ბიშკეკი, კუალა ლუმპური და სხვა. აღსანიშნავია, რომ ავიაკომპანია „ეარ ასტანა" 44 მიმართულებით ახორციელებს ფრენებს და ავია პარკის შემადგენლობაში 24 თვითმფრინავი გააჩნია.
ახალი ავიაკომპანიის პირველი რეისის აღსანიშნავად თბილისის საერთაშორორისო აეროპორტში გაიმართა საზეიმო ღონისძიება, რომელსაც ესწრებოდნენ საქართველოს მთავრობის ოფიციალური პირები, ყაზახური ავიაკომპანიის წარმომადგენლები და ყაზახეთის საელჩოს წარმომადგენლები.
თბილისისა და ბათუმის საერთაშორისო აეროპორტების მმართველი „ტავ ჯორჯია" TAV Airports ჰოლდინგის შვილობილი კომპანიაა. ტავ ჰოლდინგი მსოფლიოს ათი აეროპორტის მართვას ახორციელებს და ერთგულად მიჰყვება მის მიერ აღებულ კურსს საავიაციო ინდუსტრიაში გლობალური ლიდერის ადგილის მოსაპოვებლად. „ტავ ჯორჯია" საქართველოში 2005 წლიდან მოღვაწეობს. აეროპორტების მართვის საქმეში უდიდესი გამოცდილების, სწორი მენეჯმენტისა და მსოფლიოს სხვადასხვა ქვეყანაში განხორციელებული მრავალმილიონიანი ინვესტირების წყალობით მალევე მოიპოვა ერთ-ერთი ყველაზე საიმედო, სტაბილური და დინამიური კომპანიის სახელი.
2010 წელს TAV Airports Holding -მა 300 ავიაკომპანიის მიერ შესრულებული 420 000 რეისის 48 მილიონ მგზავრს გაუწია მომსახურება და ათი აეროპორტის ოპერირებას ახორციელებს მსოფლიოს სხვადასხვა კუთხეში, მათგან ოთხს თურქეთში (სტამბულის, ანკარის, იზმირის და ანტალიის), ორს საქართველოში (თბილისის და ბათუმის), ორს ტუნისში (მონასტირსა და ენფიდაში) და ორს მაკედონიაში (სკოპიესა და ოჰრიდის).