კომპანია "რუსეთის რკინიგზამ" ე.წ. აფხაზური რკინიგზის "ვესიოლოე-სოხუმის" მონაკვეთის სარეკონსტრუქციო სამუშაო დაასრულა. განცხადება ამის შესახებ "რუსეთის რკინიგზის" პრეზიდენტმა ვლადიმერ იაკუნინმა გააკეთა.
"მოდერნიზაცია მთავრობათაშორისი შეთანხმების თანახმად დავასრულეთ", _ განაცხადა იაკუნინმა.
აღნიშნული სამუშაო მიმდინარე წლის თებერვალში დაიწყო და გეგმის თანახმად, სამი თვის განმავლობაში მიმდინარეობდა. ამისათვის სეპარატისტულ აფხაზეთში 600 ერთეული მოძრავი შემადგენლობა გაიგზავნა. სამუშაოს საწარმოებლად აფხაზეთში 500 მუშა მიავლინეს.
