24 სახეობის კარაქიდან 9 მიკრობიოლოგიურად დაბინძურებულია, - ასეთ შედეგს აქვეყნებს "საქართველოს მომხმარებელთა ფედერაცია" და ასოციაცია "საქართველოს რძე", რომლებმაც ბაზარზე არსებული პროდუქცია შეიასწავლეს.
როგორც მომხმარებელთა ფედერაციის თავმჯდომარემ მადონა კოიძემ 30 მაისს გამართულ პრესკონფერენციაზე განაცხადა, ნაკლოვან პროდუქტებს შორის ფიგურირებს საზოგადოებისთვის ცნობილი ისეთი ბრენდები როგორიცაა "რუსთავი ნამდვილი", "გლეხური კარაქი", "რუსთავი".
მისივე თქმით, ამ ბრენდების მწარმოებელ კომპანიებს ფედერაციამ ვერ მიაგნო, ვინაიდან შეფუთვაზე მწარმოებლის შესახებ ინფორმაცია არ არის მითითებული.
"დასახელებული სამივე პროდუქტი მიკრო-ბიოლოგიურად დაბინძურებულია ან მომატებულია მიკრობების საერთო რაოდენობა. ჩამოთვლილ პროდუქტებში ასევე შეინიშნება წონისა და ცხიმის ნაკლოვანება. რაც შეეხება შპს "კარაქი +"-ის მიერ წარმოებულ "ჯეობუტერსა" და "კავკასიონს", ცხიმის ნაკლოვანება დაფიქსირდა", - განაცხადა კოიძემ და აღნიშნა, რომ ნაკლოვან პროდუქტებს შორისაა უკრაინაში, გერმანიასა და ზელანდიაში წარმოებული წონის (სპრედი ან ნაღების) კარაქი.
"მათში მომატებულია მიკრო-ბილოგიური მაჩვენებლები, რომელიც შესაძლოა იმით იყოს გამოწვეული, რომ დარღვეულია შენახვის პირობები და კუსტარულად (დაბინძურებული ხელსაწყოების გამოყენების გამო) დაფასოების შედეგია," - განმარტავს კოიძე.
დარღვევები არ აღმოჩენილა შემდეგ ბრენდებში: "სანტინო" და "ევროპული კარაქი" (მწარმ: "სანტე"), "შატილი" (მწარმ: ინდ.მეწარმე "მექიშვილი"), "ეკო-ფუდი" (მწარმ: "ჯორჯიან ეკო"), "ნაღების კარაქი", "სამგორის კარაქი" და "სამგორი მსუბუქი" (მწარმ: "სამგორი 07"), "ბარნელი" და "რუსთავი II" (მწარმ: "ბარნელი"), "ტიფლისი გოლდი" (მწარმ: შპს "ტიფლისი-2011").
რაც შეეხება იმპორტირებულ ბრენდებს დადებითი შედეგები აჩვენა: Lurpak (მწარმ: დანია), Valio (მწარმ: ფინეთი), Fin (მწარმ: ფინეთი), "ელისეევსკი" (მწარმ: ფინეთი), "ზოლოტავა" (მწარმ: უკრაინა).
დადებითი შედეგების მქონე კარაქის ან სპრედის ბრენდების ფასი 1,20-3,45 ლარია, ნაკლოვანი პროდუქტების ფასი კი 0,45-1,00 ლარია.
როგორც ორგანიზატორები ამბობენ, კარაქის რეიტინგული შეფასება (უვნებლობა, ხარისხი) ჩაატარა. კვლევის მიზანი მომხმარებლის ინფორმირება და კეთილსინდისიერი მეწარმეობის განვითარებისა და ჯანსაღი კონკურენტუნარიანი გარემოს ჩამოყალიბების ხელშეწყობაა.
კვლევის ავტორების განმარტებით, რეიტინგული შეფასება გაკეთდა ლაბორატორიული კვლევის შედეგების მიხედვით, რომელშიც შესაბამისი პროფილის სპეციალისტებმა მიიღეს მონაწილეობა.
წარდგენილი ნიმუშების შესწავლა ორ დამოუკიდებელ ლაბორატორიაში "ციტო" და "ნორმა" ჩატარდა.
