ჟენევის საერთაშორისო მოლაპარაკებათა მორიგი რაუნდის მოსამზადებელი სამუშაო განიხილეს მოსკოვში რუსეთის საგარეო საქმეთა მინისტრის მოადგილემ გრიგორი კარასინმა და ჟენევის მოლაპარაკებათა თანათავმჯდომარეებმა პიერ მორელიმ (ევროკავშირი), ანტი ტურუნენმა (გაერო) და გედრიუს ჩეკუალესმა (ეუთო). ინფორმაციას ამის შესახებ რუსეთის საგარეო საქმეთა სამინისტრო ავრცელებს.
"შეხვედრაზე განიხილებოდა სიტუაცია აფხაზეთისა და სამხრეთ ოსეთის საზღვრებზე საქართველოსთან. რუსულმა მხარემ ყურადღება გაამახვილა აფხაზეთისა და სამხრეთ ოსეთის რესპუბლიკისთვის მყარი გარანტიების მიცემაზე", _ ნათქვამია რუსეთის საგარეო საქმეთა სამინისტროში.
შეგახსენებთ, რომ ჟენევის საერთაშორისო მოლაპარაკებათა მორიგი რაუნდი 7 ივნისს გაიმართება.
