სახალხო დამცველის რეკომენდაციებზე რეაგირება ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრომ "ქრისტიან-დემოკრატებთან" ომბუდსმენის ანგარიშის შემდეგ დაიწყო. ამის შესახებ სახალხო დამცველმა გიორგი ტუღუშმა პარლამენტში, ადამიანის უფლებების დაცვისა და იურიდიულ საკითხთა კომიტეტების ერთობლივ სხდომაზე, ანგარიშის განხილვისას განაცხადა.
"რაც პარლამენტში "ქრისტიან-დემოკრატებთან" შეხვედრაზე ვთქვი, რომ სუბელიანის უწყება ჩემს რეკომენდაციებს არ პასუხობს, ამის შედეგ 60 რეკომენდაციიდან რამდენიმეზე პასუხი მივიღე", - აღნიშნა ომბუდსმენმა.
შეგახსენებთ, რომ პარლამენტში ერთი თვის წინ სახალხო დამცველმა "ქრისტიან-დემოკრატებთან" შეხვედრის დროს განაცხადა, რომ ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტრო "ურჩი" უწყებების სიაში ლიდერია.
