ოკუპანტებმა სოფელ ჭალოვანთან დაკავებული ოთხივე ქართველი გაათავისუფლეს. გადაწყვეტილება დვანში ინციდენტების პრევენციის მორიგ შეხვედრაზე მიიღეს, რომელიც ცოტა ხნის წინ დასრულდა. ინფორმაციას შიდა ქართლის სამხარეო პოლიცია ადასტურებს. დაკარგულმა სამმა ახალგაზრდამ გამოქცევა გამთენიისას შეძლო.
სოფელში დაბრუნებულები ყვებიან, რომ ტყის მიმდებარე ტერიტორიას საოკუპაციო რეჟიმის შეიარაღებული წარმომადგენლები აკონტროლებდნენ.
რუსი ოკუპანტების მიერ პერევთან დაჭრილი 27 წლის შოთა შუბითიძის ჯანმრთელობის მდგომარეობა კი უკვე სტაბილურია, მის სიცოცხლეს საფრთხე არ ემუქრება.
შედარებით მძიმეა მეორე დაჭრილის, 17 წლის გიორგი ლომსაძის მდგომარეობა. მოზარდი საჩხერის საავადმყოფოდან თბილისის რესპუბლიკურ კლინიკაში გადმოიყვანეს. დაზარალებული ამ დრომდე რეანიმაციულ განყოფილებაშია. როგორც ექიმები აცხადებენ, ლომსაძეს შესაძლოა რამდენიმე დღეში განმეორებითი ქირურგიული ოპერაცია ჩაუტარდეს.
