ახალი საგადასახადო კოდექსის წარმატებით აღსრულებაში მთავრობას IFC-იც დაეხმარება. ფინანსთა სამინისტრო და IFC მიკრო და მცირე საწარმოებისთვის საგადასახადო ტვირთის შემცირების მიზნით ითანამშრომლებენ საერთაშორისო საფინანსო კორპორაციასა და ფინანსთა სამინისტროს შორის თანამშრომლობის შესახებ ხელშეკრულება უკვე გაფორმდა. პროექტის პირველი ეტაპის ღირებულება 0,5 მლნ. ლარია და მის ფარგლებში სახელმწიფო თავის თავზე აიღებს, ტრენინგების ჩატარებისათვის საჭირო ფართსა და შესაბამის კომუნიკაციას.
ფინანსთა მინისტრის კახა ბაინდურაშვილის განმარტებით, პროექტის ფარგლებში მიკრო და მცირე ბიზნესის წარმომადგენლებისათვის მოეწყბა ტრენინგები, რათა ახალი საგადასახადო კოდექსისა და მის ცალკეული მუხლების შესახებ მეწარმეების ინფორმირებულობა მოხდეს.
"დღეს IFC -სთან ხელი მოვაწერეთ ხელშეკრულებას, რომლის ფარგლებშიც განხორციელდება სასწავლო კურსები მიკრო და მცირე ბიზნესის წარმომადგენლებისათვის. თავიანთი ბიზნესის წარმარტებისათვის მათ ხელშეწყობა ჭირდებათ. ჩვენი ამოცანაა, რომ ხელი შევუწყოთ ამ ადამიანებს თავინთ საქმიანობაში, იმისათვის რათა ისინი არ წააწყდნენ სხვადასხვა ტიპის ბარიერებს თავიანთ ბზინეს საქმიანობებში. ჩვენი მიზანი არაა, რომ ვინმე დაჯარიმდეს. აუცილებელია, რომ შევქმნათ სათანადო ინსტრუმენტები, რათა ბიზნესმა ადვილად იურთიერთოს ჩვენთან და ადვილად შეძლონ კანონმდებლობის წაკითხვა. ამ ადამიანებთან მივალთ და ავუხსნით და განვუმარტავთ კანონმდებლობის ცალკეულ მუხლებს. ჩვენ კარგად ვიცით, რომ ამ ადამიანებს არ აქვთ პროფესიული ბუღალტრის უნარ-ჩვევები და ჩვენი მიზანია, რომ ისინი გავარკვიოთ და შესაბამისად დავეხმაროთ"- განაცხადა კახა ბაინდურაშვილმა.
IFC -ს კავკასიაში რეგიონალური დირექტორი ტომას ლუბეკის თქმით, IFC ფინანსთა სამინისტროს ახალი კანონის სათანადოდ აღსრულებაში დაეხმარება.
"ეს პროექტი ეფუძნება, იმ ძალიან კარგ თანამშრომლობას, რომელიც ჩვენ შემოსავლების სამსახურთან და ფინანსთა სამინისტროსთან უკანასკნელი წლების განმავლობაში გვქონდა. IFC-მ ფინანსთა სამინისტროსთან ერთად ძალიან ბევრი იმუშავა, რათა მცირე და მიკრო ბიზნესებისათვის რეჟიმი გაგვემარტივებინა და მათთვის საგადასახადო ტვირთი შეგვემსუბუქებინა. იმისათვის, რომ რომელიმე ახალი კანონი წარმატებული აღმოჩნდეს აუცილებელია მის აღსრულებაზე აქცენტირება. დღეს, გაფორმებული ხელშეკრულების საფუძველზე, შევეცდებით დავეხმაროთ ფინანსთა სამინისტროს და შემოსავლების სამსახურს, რათა ახალი კანონი და წესები სათანადოდ იქნეს აღსრულებული. პროექტის განხორციელების პროცესში ძირითადი სამუშაო განხორცილდება შემდეგნაირად: უნდა შევხვდეთ მიკრო და მცირე ბიზნესის წარმომადგენლებს და აგრეთვე სხვა მეწარმეებს და ვასწავლოთ მათ ახალი საგადასახადო კოდექსით მინიჭებული შეღავეთებით სარგებლობა, რათა მათ მიიღონ სრული სარგებელი ამ კოდექსის ამოქმედებით", - განაცხადა IFC -ს რეგიონალურმა დირექტორმა კავკასიაში ტომას ლუბეკმა.
IFC -ის ინფორმაციით, თანამშრომლობის მიზანია მიკრო და მცირე საწარმოებისთვის საგადასახადო ტვირთის შემცირება, რაც ახალ საგადასახადო სისტემებთან დაკავშირებით მეწარმეთა ტრენინგების მეშვეობით გახდება შესაძლებელი და მათ რეფორმების შედეგად სარგებლის მიღებაში, კერძოდ კი დროისა და თანხების დაზოგვაში დაეხმარება.
