საფასურის გადახდის გარეშე სატვირთო ავტოსატრანსპორტო საშუალების გადაადგილება აღარ დაჯარიმდება. აღნიშნულთან დაკავშირებით ცვლილება შედის "საავტომობილო გზების შესახებ~ კანონში, რომლის თანახმადაც, კანონის 144 მუხლი უქმდება.
დღეს არსებული ნორმის თანახმად, დაუშვებელია საფასურის გადახდის გარეშე საბაჟო კონტროლის/ზედამხედველობის ქვეშ სატვირთო ავტოსატრანსპორტო საშუალების საქართველოს ტერიტორიაზე გადაადგილება/ტვირთის გადაზიდვა.
საფასურის გადახდის გარეშე საბაჟო კონტროლის/ზედამხედველობის ქვეშ სატვირთო ავტოსატრანსპორტო საშუალების საქართველოს ტერიტორიაზე გადაადგილება/ტვირთის გადაზიდვა იწვევს სატვირთო ავტოსატრანსპორტო საშუალების მფლობელის/მძღოლის დაჯარიმებას დადგენილი საფასურის სამმაგი ოდენობით.
როგორც კანონპროექტის განმარტებით ბარათშია ნათქვამი, აღნიშნული პროექტი მიზნად ისახავს საფასურის გადამხდელ პირთა ფინანსური მდგომარეობის შემსუბუქებას, საფასურის გადახდის ვალდებულების შენარჩუნებით.
გარდა ამისა, როგორც დარგობრივი ეკონომიკისა და ეკონომიკური პოლიტიკის კომიტეტის სხდომაზე ფინანსთა მინისტრის მოადგილემ რუსუდან კემულარიამ განმარტა, აღნიშნული ნორმის გაუქმების შემდეგ გადამზიდავებს თუ გადაადგილება/ტვირთის გადაზიდვის საფასურის არ ექნებათ გადახდილი, ისინი ქვეყნის ეკონომიკურ ზონას მაინც ვერ დატოვებენ.
