ნიდერლანდების სამეფოს საელჩოს მიერ ორგანიზირებულ დედოფლის დღის აღსანიშნავად გამართულ ოფიციალურ წვეულებაზე "ფაქიზოს" რძის პროდუქტების პირველი პრომოაქცია გაიმართა.
"კაუკაზუს აგროდეველოფმენთი" შვილობილი კომპანია "უნიფარის" ინფორმაციით,მათმა პროდუქციამ დადებითი შეფასება დაიმსახურა მოწვეულ სტუმრებში. განსაკუთრებული მოწონება დაიმსახურა ჰოლანდიურმა ყველმა გაუდამ.
წარმატებით გრძელდება"უნიფარმსა" და ნიდერლანდების საელჩოს შორის მჭიდრო თანამშრომლობა, რომელიც წლების წინ ალანიების ოჯახიდან დაიწყო (ალანიას ოჯახი "უნიფარმში" გაერთიანების შემდგომ "უნიფარმის" უმცირესი წილის მფლობელი გახდა). ალანიების ოჯახი წლების განმავლობაში მონაწილეობას იღებდა საელჩოს ამიერ ორგანიზებულ სხვადასხვა ტექნიკური დახმარების პროგრამასა თუ ტრეინინგში, როგორც საქართველოში, ასევე ჰოლანდიაში.
"მოხარულნი ვართ, რომ მონაწილეობა მივიღეთ ასეთ საპატიო ღონისძიებაში, რომელიც ნიდერლანდების საელჩომ მოაწყო და მოგვეცა შესაძლებლობა, "ფაქიზოს" რძის პროდუქცია წარმოგვედგინა მოწვეული სტუმრებისთვის, რომელთაგანაც დადებითი შეფასება მივიღეთ. ორმაგად სასიხარულოა, რომ ჩვენ მიერ დამზადებულმა ჰოლანდიურმა ყველმა გაუდამ ჰოლანდიელი სტუმრების განსაკუთრებული მოწონება დაიმსახურა, რასაც წლების განმავლობაში დაგროვილი გამოცდილებით და ნიდერლანდების საელჩოს მიერ ორგანიზირებულ პროგრამებში მონაწილეობით მივაღწიეთ", - განაცხადა "კაუკაზუს აგროდეველოფმენთის" გენერალურმა დირექტორმა რატი მექვაბიშვილმა.
ამ დროისათვის "ფაქიზოს" პროდუქციის რეალიზაცია დასავლეთ საქართველოში ხორციელდება. მომავალი წლიდან, კომპანია წარმოების გაზრდას და თბილისში ბაზრის მნიშვნელოვანი წილის დაკავებას გეგმავს. იმავდროულად, "უნიფარმი" აპირებს ასორტიმენტის გაფართოებას და რძის ნაწარმის, მათ შორის სხვადასხვა სახეობის ყველის დამატებას.
სს "უნიფარმი" არის რძის პროდუქტების ერთადერთი მწარმოებელი საქართველოში თავისი რძის მეურნეობით.
"მოხარულნი ვართ, რომ დავიწყეთ ფაქიზოს ბრენდით რძის პროდუქტების გამოშვება. ფაქიზოს რძის ნაწარმის გადამუშავება ხდება უმკაცრეს სანიტარულ პირობებში, სადაც ყველა პროცესი და დანადგარი გათვლილია იმისათვის, რომ ვაწარმოოთ მაღალი ხარისხის რძე და რძის პროდუქტები", - განაცხადა მექვაბიშვილმა.
სს „უნიფარმი" ერთ-ერთი ყველაზე თანამედროვე სარძევე ფერმაა საქართველოში, რომელსაც აქვს წარმოების მთლიანი ჯაჭვი - წარმოება, გადამუშავება და დისტრიბუცია. სს "კაუკაზუს აგროდეველოფმენთის" ინფორმაციით, პროექტის სრული ღირებულება 3 მლნ. ლარია. კომპანიაში აცხადებენ, რომ სადგომი აშენებულია ევროპული სტანდარტების მიხედვით და ყველა იმ დეტალს ითვალისწინებს, რომელსაც გავლენა აქვს ძროხის მოვლისთვის.
ჰოლანდიური კომპანიის DSD Stalinrichting -ის ინჟინრებმა სადგომში მაღალი ხარისხის შიდა მოწყობილობები და თანამედროვე ნაკელ-გამტანი და სავენტილაციო სისტემები უკვე დაამონტაჟეს.
"კაუკაზუს აგროდეველოფმენთი" (კად) წარმოადგენს სააქციო საზოგადოებას რომელიც 2008 წლის გაზაფხულზე დაფუძნდა და მის ძირითად საქმიანობას წარმოადგენს ინვესტიციების განხორცილება სოფლის მეურნეობის სექტორში ამიერკავკასიის რეგიონში. კად-ის საინვესტიციო საქმიანობის ძირითად დარგობრივ მიმართულებებს წარმოადგენს რძის პროდუქტების წარმოება, მეცხოველეობა, მეფრინველეობა, მეთევზეობა, სასათბურე მეურნეობა და სასაწყობო ინფრასტრუქტურის მშენებლობა.
