"ქრისტიან-დემოკრატები" პარლამენტს ასოციაციის „სამართალი და თავისუფლება" მიერ მომზადებულ საკანონმდებლო ინიციატივას წარუდგენენ. ამის შესახებ დღეს ასოციაციის ხელმძღვანელმა ირაკლი სესიაშვილმა და დეპუტატმა ნიკა ლალიაშვილმა ისაუბრეს.
ინიციატივა საქართველოს კანონში „სამხედრო ვალდებულებებისა და სამხედრო სამსახურის შესახებ" ცვლილებებს ითვალისწინებს. ცვლილება წვევამდელთა ასაკს ეხება. ირაკლი სესიაშვილის განცხადებით, დღეს მოქმედი კანონმდებლობით, წვევამდელთა მინიმალური ზღვარი 18 წელია, რაც უნდა შეიცვალოს და სამხედრო ვალდებულად ჩაითვალონ საქართველოს მოქალაქეები 20-დან 27 წლამდე.
„განათლების სისტემაში განხორციელებული რეფორმის შემდეგ, როცა სკოლაში სწავლება 12 წლიანი გახდა, საშუალო განათლებამიღებულ ახალგაზრდას აღარ ეძლევა უმაღლეს სასწავლებელში გამოცდების ჩაბარების დრო. ამით ირღვევა განათლების უფლება. ამას გარდა, სპეციალისტების კვლევების თანახმად,18 წლის ასაკის ახალგაზრდა არც ფიზიკურად და არც ფსიქოლოგიურად არ არის მზად სამხედრო სამსახურისთვის დამახასიათებელი დატვირთვისთვის. ყველა ამ ფაქტორის გათვალისწინებით, ჩვენ აუცილებლად მიგვაჩნია მინიმალური ზღვარის 20 წლამდე აწევა" - განაცხადა ირაკლი სესიაშვილმა.
მისივე თქმით, სკოლადამთავრებული ახალგაზრდები, ვისაც სწავლის უმაღლესში გაგრძელება სურს, დამოკიდებული არიან ე. წ. კომისარიატების კეთილ ნებაზე, რაც კანონდარღვევას ნიშნავს.
„ჩვენ აქტიურად ვთანამშრომლობთ ბევრ არასამთავრობო ორგანიზაციასთან და საკანონმდებლო ინიციატივის სახეს ვაძლევთ მათ მიერ მომზადებულ პროექტებს. ამჯერადაც, წარმოდგენილია ძალზე აქტუალური ცვლილება სამხედრო სამსახურის შესახებ კანონში. „ქრისტიან-დემოკრატები" ვიმედოვნებთ, რომ უმრავლესობა გაიზიარებს ჩვენს მოთხოვნას და კანონ-პროექტის კანონად ქცევის შემდეგ 30 ათასამდე ახალგაზრდას მიეცემა სწავლის უფლება" - განაცხადა ნიკა ლალიაშვილმა.
