ნავთობპროდუქტების სერტიფიკაციის ორგანო "მონიტორინგის" შემოწმების შედეგად დადგინდა, რომ "სოკარ ჯორჯია პეტროლეუმის" მიერ იმპორტირებული აზერბაიჯანული საწვავი სრულიად შეესაბამება საქართველოს მოქმედ სტანდარტებს.
"მონიტორინგი" სისტემატურად ახორციელებს აზერბაიჯანის რესპუბლიკის სახელმწიფო ნავთობკომპანიის წარმოებული და კომპანია "სოკარ ჯორჯია პეტროლეუმის" მიერ იმპორტირებული ბენზინისა (რეგულარი) და დიზელის (ლ-62) საწვავის ხარისხობრივ შემოწმებასა და სერტიფიცირებას.
როგორც "მონიტორინგი" იუწყება, საწვავს შემადგენლობის ცალკეული კომპონენტების მიხედვით გაცილებით უკეთესი მაჩვენებლები აქვს მოქმედ სტანდარტთან შედარებით.
"კერძოდ, "სოკარ ჯორჯია პეტროლეუმის" მიერ იმპორტირებული აზერბაიჯანული რეგულარის ტიპის ბენზინის შემოწმების შედეგად დადგინდა შემდეგი ფიზიკურ- ეკოლოგიური მახასიათებლები: ოქტანური რიცხვი რეალურად შეადგენს 93 - 94.1 ერთეულს (საქართველოს მოქმედი კანონმდებლობით უნდა იყოს არანაკლებ 91 ერთეულისა); ტყვიის შემცველობა მასში ფაქტობრივად არ არის - 0,0007 - 0,0011 ერთეული (მოქმედი კანონმდებლობით - უნდა იყოს არა უმეტეს 0,013 ერთეულისა); არომატული ნახშირწყალბადების მოცულობითი წილი შეადგენს 21 - 29 პროცენტს (საქართველოს მოქმედი კანონმდებლობით უნდა იყოს არა უმეტეს 45 პროცენტისა); ბენზოლის მოცულობითი წილი არის 0.8 - 1.0 პროცენტამდე (მოქმედი კანონმდებლობით უნდა იყოს არა უმეტეს 5 პროცენტისა); გოგირდის შემცველობა არის 120 - 288 ერთეული (მოქმედი კანონმდებლობით უნდა იყოს არა უმეტეს 500 ერთეულისა). რაც შეეხება დიზელის საწვავის ლაბორატორიულ შედეგებს, ცეტანის რიცხვი შეადგენს 48.4 - 48.6 (მოქმედი კანონმდებლობით - არანაკლებ 45); აფეთქების ტემპერატურა - 67 - 68 0C (მოქმედი კანონმდებლობით - არანაკლებ 62 0C); გოგირდის მასური წილი - 293 - 321 (მოქმედი კანონმდებლობით - არა უმეტეს 350)", - აღნიშნულია "მონიტორინგის" განცხადებაში.
