ევროკავშირი სავაჭრო სისტემის რეფორმის ჩარჩოების თანახმად, ათობით ქვეყნისთვის შეღავათის ჩამოშორებას აპირებს.
იმ გეგმის შესაბამისად, რომელიც ევროპარლამენტმა და ევროკავშირის 27 ქვეყანამ უნდა დაამტკიცოს, რუსეთი, ბრაზილია, არგენტინა, საუდის არაბეთი და შედარებით წარმატებით განვითარებადი მრავალი სხვა ქვეყანა საბაჟო ტარიფებზე შეღავათს აღარ მიიღებენ.
ამასთან, ევროკავშირი მობილიზებული იქნება, დაეხმაროს უფრო ღარიბ ქვეყნებს, როგორიცაა უკრაინა და პაკისტანი.
გლობალური ეკონომიკური დისბალანსი ბოლო ათწლეულში შეიცვალა.
"საბაჟო ტარიფები რეკორდულ მინიმუმს მიუახლოვდა. თუკი შეღავათიან ტარიფებს ვაწესებთ ამ კონკურენტულ გარემოში, ბევრი მათგანი მათკენ უნდა მივმართოთ, ვინც ამას საჭიროებს", - აღნიშნა ვაჭრობის ევროკომისარმა კარელ დე გიუხტმა.
გეგმის მიხედვით, სავაჭრო რეფორმა 2014 წელს დასრულდება. ამით ევროკავშირი დაიცავს თავის წარმოებას ექსპორტზე ორიენტირებული ეკონომიკისგან და ამავდროულად, ვაჭრობას საგარეო პოლიტიკისთვის გამოიყენებს.
ევროკავშირმა განვითარებად ქვეყნებს სავაჭრო შეღავათი 1971 წელს დაწესებული პრეფერენციის სისტემის თანახმად გაუხანგრძლივა. 2008 წელს ევროპამ 6 ათასი დასახელების პროდუქციაზე ღარიბ ქვეყნებს შეღავათი დაუწესა და ამით მათ 3 მილიარდი ევროს ეკონომიის შესაძლებლობა მისცა.
