ეკონომიკისა და მდგრადი განვითარების სამინისტრო პროექტ "საქართველოს სამოქალაქო ავიაციის კანონმდებლობისა და სტანდარტების ევროკავშირის ნორმებთან ჰარმონიზაციას" მასპინძლობს.
პროექტის მიზანია, გააძლიეროს საქართველოს სამოქალაქო ავიაციის სააგენტოს პოზიციები, რაც დააჩქარებს ევროკავშირის ნორმებთან ჰარმონიზაციის პროცესს და ხელს შეუწყობს ინფრასტრუქტურის სამომავლო განვითარებას. ამ მიზნით, პროექტის მესვეურები ყურადღებას ამახვილებენ შესაძლებლობების სისტემური გაძლიერების მნიშვნელობაზე, რათა საქართველოს ადმინისტრაციამ შეძლოს ახალი დებულებების დანერგვა. პროექტის ფარგლებში უნიკალური შესაძლებლობა იქნება იმისთვის, რომ ქართველმა ექსპერტებმა გერმანელ და ავსტრიელ კოლეგებთან ითანამშრომლონ.
პროექტის პირველ ეტაპზე შეფასდება სამოქალაქო სააავიაციო სისტემის სტრუქტურა და განიხილულ იქნება საკვანძო საკითხები. ყოველივე ეს კეთდება სამომავლოდ ევროპული კანონმდებლობის მოთხოვნების დასაკმაყოფილებლად. ეს ანალიზი კი ხორციელდება იურიდიული გეგმის შესამუშავებლად, რომელზეც ევროსტანდარტებთან შემდგომი ჰარმონიზაცია დაფუძნდება. პრიორიტეტული საკითხებია - საავიაციო უსაფრთხოება, საჰაერო მოძრაობის მართვა, აეროპორტებისთვის და მომსახურე პერსონალისთვის ლიცენზიების მინიჭება და სხვა თანმხლები საკითხები.
პროცესში ჩართულები არიან წამყვანი გერმანელი და ავსტრელი ექსპერტები საავიაციო კანონმდებლობის სფეროში. ისინი ქართველ კოლეგებს ხელს შეუწყობენ მუშაობაში.
პროექტის ხელმძღვანელებს დღეს ეკონომიკისა და მდგრადი განვითარების მინისტრი ვერა ქობალია შეხვდა. მინისტრმა საქართველოს სამოქალაქო ავიაციის განვითარების საკითხები გერმანიის ტრანსპორტის, მშენებლობისა და ურბანული განვითარების ფედერალური სამინისტროს გენერალურ დირექტორთან, თილო შმიდტთან, კომპანია Austro Control GmbH-ის მენეჯერთან, ვილჰელმ იაგრიტშისთან და საქართველოს სამოქალაქო ავიაციის სააგენტოს დირექტორთან, ირაკლი დავითაძესთან ერთად განიხილა.
ღონისძიების ბენეფიციარი დაწესებულება საქართველოს სამოქალაქო ავიაციის სააგენტოა. ევროკავშირის მხრიდან ღონისძიების პარტნიორები არიან გერმანიის ტრანსპორტის, მშენებლობისა და ურბანული განვითარების ფედერალური სამინისტრო, სააგენტო და ავსტრიის საჰაერო სანავიგაციო მომსახურების კომპანია "Austro Control GmbH."
სამოქალაქო ავიაციის ინფრასტრუქტურის გასავითარებლად და მისთვის მიმზიდველობის შესამატებლად საჭიროა კანონმდებლობის ევროსტანდარტებთან ჰარმონიზაცია. აღნიშნულ პროექტს უმნიშვნელოვანესი როლი ექნება ამ პროცესში.
აღნიშნული პროგრამა ფინანსდება ევროკავშირის "შეწყვილების" პროგრამის ფარგლებში.
"შეწყვილების" პრინციპი ევროკავშირის ინსტრუმენტია, რათა ჩამოაყალიბოს თანამშრომლობა ევროკავშირის წევრ ქვეყნებსა და მათ ბენეფიციარებს შორის. "შეწყვილება" გამოიყენება მეზობელი ქვეყნების ხელშესაწყობად, რათა მათ შეძლონ ევროსტანდარტების დანერგვა ტრენინგების, შესაძლებლობების ზრდის და ახალი კანონმდებლობის ჩამოყალიბების ხარჯზე. "შეწყვილების" პროგრამა საქართველოში 2007 წლიდან არსებობს ევროპული მეზობლობის პოლიტიკის ფარგლებში.
აღნიშნული პროგრამა 10 წელიწადზე მეტია, არსებობს და იგი უკვე წარმატებით განხორციელდა აღმოსავლეთ ევროპის რამდენიმე ქვეყანაში, რომლებიც მომავალში ევროკავშირის წევრები გახდნენ. შესაბამისად, აღნიშნული პროგრამა ეფექტური ინსტრუმენტია ევროინტეგრაციისთვის.
გერმანიის ტრანსპორტის, მშენებლობისა და ურბანული განვითარების ფედერალური სამინისტრო საქართველოში 18 თვით განათავსებს სამოქალაქო ავიაციის ოფიცერს, დოქტორ ჯორგ ჰამერშმიდტს საქართველოში კონსულტანტის რანგში.
პროექტი ხორციელდება European Neighbourhood and Partnership Instrument-is Gesellschaft fuer internationale Zusammenarbeit-ის ხელშეწყობით.
პროექტის ხანგრძლივობაა 18 თვე.
