დღეს, 11 მაისს, 12:00 საათზე, "საქართველოს კარიტასმა" პროფესიული სადურგლო სახელოსნო" გახსნა.
როგორც "საქართველოს კარიტასის" ხელმძღვანელმა ვიტოლდ შულჩინსკიმ განაცხადა, სახელოსნოს გახსნა ხელს შეუწყობს დაუცველ ბავშვებს მომავალ საქმიანობაში.
"სახელოსნოს გახსნა დაუცველ ბავშვებს ხელობის სწავლასა და შემდგომი საქმიანობისთვის დაეხმარება. ჩვენი მიზანი სწორედ ესაა, რომ მათ დავეხმაროთ. სახელოსნოში შევასწავლით მათ ხეზე მუშაობას და ყველანაირად დავეხმარებით, რომ მომავალი შეიქმნან", - განაცხადა შულჩინსკიმ.
პროფესიულ სადურგლო სახელოსნოს რეკონსტრუქციისთვის და მოწყობისთვის ფინანსები "კარიტასის" საერთაშორისო პარტნიორებმა და დონორებმა გამოყვეს.
სახელოსნოს გახსნას საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი კობა სუბელიანიც ესწრებოდა.
"კარიტასი ჩვენი სამინისტროს ერთ-ერთი მთავარი პარტნიორია. ეს ორგანიზაცია ეხმარება ბავშვებს. მათი საქმიანობა შემდეგ ფაზაში გადავიდა, რაც გამოიხატება დევნილი ბავშვების დახმარებასა და დასაქმებაში. მადლობა კარიტასსა და იტალიის საელჩოს იმ საქმიანობისთვის, რომელსაც ისინი ეწევიან", - განაცხადა სუბელიანმა.
ღონისძიებას ასევე ესწრებოდნენ დიპლომატიური კორპუსის წარმომადგენლები და კათოლიკური ეკლესიის წარმომადგენლები საქართველოში, სომხეთსა და აზერბაიჯანში. ასევე მთავრობის წარმომადგენლები.
საქველმოქმედო ფონდი კარიტასი საქართველოში 1994 წლიდან მოღვაწეობს. ის ეხმარება ღარიბ და დაუცველ ადამიანებს განურჩევლად ეროვნებისა, აღმსარებლობისა თუ სოციალური მდგომარეობისა.
