შემოსავლების სამსახურმა საწარმოო დანაკარგი მინის მწარმოებლებისთვისაც განსაზღვრა. ამ შემთხვევაშიც საწარმოო დანაკარგების ოდენობა შემოსავლების სამსახურში შექმნილმა კომისიამ მეწარმეებისგან მოწოდებული ინფორმაციისა და საერთაშორისო გამოცდილებაზე დაყრდნობით განსაზღვრა. კერძოდ, მინის წარმოებისას საწარმოო დანაკარგი განისაზღვრა წარმოებაში ჩაშვებული კაზმის - 14 პროცენტის ოდენობით.
შემოსავლების სამსახურის გადაწყვეტილებით, მინის მწარმოებლებს საწარმოო დანაკარგი საქონლის 100-პროცენტიან მიწოდებაში აღარ ჩაეთვლებათ . თუკი, ადრე საწარმოო დანაკარგს დანაკლისად მიიჩნევდნენ და იბეგრებოდა საგადასახადო კანონმდებლობის შესაბამისად, ამიერიდან, აღნიშნული დანაკარგები დადგენილი ნორმის ფარგლებში აღარ დაიბეგრება.
შემოსავლების სამსახურის ინიციატივით, საწარმოო დანაკარგები უკვე დადგინდა მეტალურგიის სფეროში ასევე, ალკოჰოლური სასმელის წარმოებისას/იმპორტისას, აგრეთვე სიგარა/სიგარეტისა და სიგარელებისათვის გამოყენებული აქციზური მარკების დაზიანების შემთხვევაში. საწარმოო დანაკარგების საკითხი სხვა სფეროებშიც განისაზღვრება და ეს პროცესი ეტაპობრივად განხორციელდება.
მნიშვნელოვანია ისიც, რომ სურვილის შემთხვევაში მეწარმეებს შეეძლებათ მიმართონ შემოსავლების სამსახურს, რომელიც მათ საწარმოო დანაკარგს, გარკვეულ ფასად განსაზღვრავს.