საქართველოს სტატისტიკის ეროვნულმა სამსახურმა მაისის ინფლაციის გაანგარიშების პირველი ეტაპი დაიწყო. 10 მაისიდან 20 მაისის ჩათვლით სამომხმარებლო ფასების რეგისტრაციის საველე სამუშაო ჩატარდება. კვლევის მიზანი 2011 წლის მაისში საქართველოში ინფლაციის დონის გაანგარიშებაა.
ფასებზე დაკვირვება ფასების 20 რეგისტრატორის მიერ საქართველოს ხუთ ქალაქში: თბილისში, ქუთაისში, ბათუმში, გორსა და თელავში მოხდება. ფასები შეგროვდება 1300 სავაჭრო და მომსახურების ობიექტზე.
მაისის ინფლაციის მაჩვენებელი მიმდინარე წლის 3 ივნისს გამოქვეყნდება.
ამავე დროს, საქსტატი პირველად გამოაქვეყნებს მაისის საბაზო ინფლაციის მაჩვენებელს, რაც გულისხმობს სამომხმარებლო ფასების ინდექსის გაანგარიშებას სამომხმარებლო კალათაში შემავალი იმ საქონლისა და მომსახურების ფასების გარეშე, რომლებსაც ახასიათებთ პერიოდული ფასების ცვალებადობა.
