2 და 3 მაისს საქართველოში გაეროს მუდმივი კოორდინატორი და გაეროს განვითარების პროგრამის (UNDP) ხელმძღვანელი, ჯეიმი მაკგოლდრიკი აჭარას ეწვევა. ის ავტონომიური რესპუბლიკის ხელმძღვანელობას შეხვდება და ბათუმში მიმდინარე პროექტების მსვლელობას გაეცნობა.
2 მაისს დაგეგმილ შეხვედრაზე ჯეიმი მაკგოლდრიკი და აჭარის ავტონომიური რესპუბლიკის მთავრობის თავმჯდომარე ლევან ვარშალომიძე ახალი პროექტის შესახებ შეთანხმებას მოაწერენ ხელს.
ახალი ინიციატივის პრიორიტეტებია ვაჭრობის ხელშეწყობა და აჭარის ავტონომიურ რესპუბლიკაში უცხოური ინვესტიციების მოზიდვის სტიმულირება. გარდა ამისა, გაგრძელდება მცირე ბიზნესის მხარდაჭერა და პროფესიული განათლების განვითარება.
გაეროს განვითარების პროგრამა (UNDP) აჭარაში 2008 წლიდან მუშაობს. მისი ხელშეწყობით არა ერთი წარმატებული ინიციატივა განხორციელდა. მათ შორისაა: ბათუმის ბიზნეს ინკუბატორი, ბათუმის ციფრული რუკა და აუდიო მეგზური, პროფესიული სასწავლო კურსები სოფლის მეურნეობის, მშენებლობის, გადამამუშავებელი მრეწველობის, ტურიზმისა და საინფორმაციო ტექნოლოგიების დარგებში, და სოფლის მეურნეობის პერსპექტივების კვლევა.
პროექტს, რომლის ბიუჯეტი 700 აშშ დოლარს აღწევს, გაეროს განვითარების პროგრამა (UNDP) და აჭარის ავტონომიური რესპუბლიკის მთავრობა აფინანსებს. გაეროს განვითარების პროგრამის (UNDP) ინიციატივა აჭარაში 2013 წლის ბოლომდე გაგრძელდება.