განათლებისა და მეცნიერების მინისტრად სასჯელაღსრულების, იურიდიული დახმარებისა და პრობაციის მინისტრი დიმიტრი შაშკინი ინიშნება.
როგორც დღეს საღამოს, მთავრობის კანცელარიაში გამართულ პრესკონფერენციაზე პრემიერ-მინისტრმა ნიკა გილაურმა განაცხადა, განათლების უკვე ყოფილმა მინისტრმა ნიკა გვარამიამ რამდენიმე თვის წინ უცხოეთში სასწავლებლად წასვლის სურვილი გამოთქვა, თუმცა, ამ თვეების განმავლობაში იგი მუშაობას აღნიშნულ პოსტზე პრემიერის თხოვნით კვლავ აგრძელებდა.
როგორც შაშკინმა განაცხადა, ყველა რეფორმა, რომელიც დაწყებულია, აუცილებლად გაგრძელდება და დაჩქარდება კიდეც. პრემიერ-მინისტრი დიმიტრი შაშკინს განათლების მინისტრის პოსტზე უახლოეს დღეებში ოფიციალურად წარადგენს. სასჯელაღსრულების მინისტრის მოვალეობას კი დროებით, მინისტრის პირველი მოადგილე შეასრულებს
ნიკა გილაურმა ნიკა გვარამიას მუშაობის პერიოდი წარმატებულად შეაფასა და აღნიშნა, რომ ამ პოსტზე დიმიტრი შაშკინი დაინიშნება, რომელსაც საუკეთესო მენეჯმენტისა და დიალოგის კარგად წარმართვის გამოცდილება აქვს. პრემიერის განცხადებით, განათლების სამინისტრო საკმაოდ რთული და ერთ-ერთი წამყვანი სამინისტროა საქართველოში და მან წარმატებები უსურვა დიმიტრი შაშკინს ამ სამინისტროს ხელმძღვანელის პოსტზე.
