„ქრისტიან-დემოკრატების" ინფორმაციით, ევროპის საბჭოს ადამიანის უფლებათა სასამართლომ წარმოებაში მიიღო 2008 წლის მაისის საპარლამენტო არჩევნებში ვანის მაჟორიტარობის კანდიდატის დათო ლორთქიფანიძის სარჩელი.
ამის შესახებ დღეს გამართულ ბრიფინგზე თავად მოსარჩელემ და ადვოკატმა ლაშა გოგიჩაიშვილმა ისაუბრეს.
ლორთქიფანიძე საპარლამენტო ფრაქცია „ქრისტიან-დემოკრატების" აპარატის უფროსი და ვანის საკრებულოს წევრია, 2008 წლის საპარლამენტო არჩევნებში კი „ქრისტიან-დემოკრატიული მოძრაობიდან" ვანის N53 საარჩევნო ოლქში მაჟორიტარობისთვის იბრძოდა.
მის თქმით, სარჩელი ეხება ვანის არჩევნების შედეგების გაყალბებას, რასაც მრავალი დოკუმენტი ადასტურებს.
„ხელისუფლების წარმომადგენლების მხრიდან მმართველი პარტიის კანდიდატის სასარგებლოდ და ,,ქრისტიან-დემოკრატების" კანდიდატის საზიანოდ ოქმები 31-დან 23 უბანზე გადააკეთეს. სწორედ ამ დოკუმენტების საფუძველზე სტრასბურგის სასამართლომ გადაწყვიტა სარჩელის განხილვა და საქმეს მიანიჭა ნომერი 8853/11. ეს არის უპრეცედენტო შემთხვევა, როცა სტრასბურგი დაინტერესდა და წარმოებაში მიიღო საქართველოს საპარლამენტო არჩევნებში მონაწილე მაჟორიტარობის კანდიდატის სარჩელი" - განაცხადა ლორთქიფანიძემ.
ადვოკატ ლაშა გოგიჩაიშვილის თქმით, საქმის წარმოებაში მიღების შემდეგ გაჩნდა პერსპექტივა, რომ ევროპის საბჭოს ადამიანის უფლებათა სასამართლო დაგვიანებით, მაგრამ მაინც შეძლებს სიმართლის დადგენას, რომლის პოვნაც საქართველოს სასამართლო სისტემაში შეუძლებელი აღმოჩნდა.