ტელევიზიების სარეკლამო ჭრასთან დაკავშირებით შეზღუდვების შესახებ კანონპროეტის მესამე მოსმენით მიღება გადაიდო.
კანონპროექტის გადადება პარლამენტის პლენარულ სხდომაზე კანონპროეტის ერთ-ერთმა ინიციატორმა ჩიორა თაქთაქიშვიმა მოითხოვა, თუმცა მიზეზები არ განუმარტავს.
როგორც ცნობილია, ცვლილება შედის "მაუწყებლობის შესახებ" კანონში, რომლის თანახმად, მაუწყებლებს საშუალება მიეცემათ, სარეკლამო ჭრა გააკეთონ ახალი ამბების, საზოგადოებრივ-პოლიტიკურ, წინასაარჩევნო პროგრამებში ან დოკუმენტურ ფილმებში, რომელთა ხანგრძლივობაც 15 წუთზე მეტია, მაშინ როდესაც დღეს მოქმედი რედაქციით დადგენილია 30-წუთიანი შეზღუდვა.
45-წუთიანი შეზღუდვა შემცირდება 30 წუთამდე. დღეს მოქმედი რედაქციით იკრძალება იმ მხატვრული ფილმების, ტელეფილმების ან ფილმის სერიის შეწყვეტა, რომლის ხანგძლივობაც 45 წუთზე ნაკლებია.
ცვლილებების თანახმად, პროგრამა, რომლის ხანგრძლივობაც 30 წუთზე მეტია, შესაძლებელია შეწყდეს რეკლამით ან ტელეშოპინგით არა უმეტეს 3-ჯერ, მოქმედი კანონმდებლობით პროგრამის რეკლამით ან ტელეშოპინგით შეწყვეტა კი 3-ჯერ მხოლოდ იმ შემთხვევაში შეიძლებოდა, თუ მისი ხანგრძლივობა 45 წუთზე მეტია.
ამასთან, საბავშო ან რელიგიური გადაცემა რეკლამით ან ტელეშოპინგით 30 წუთში ერთხელ შეიძლება შეწყდეს მხოლოდ იმ პირობით, თუ გადაცემის ხანგრძლივობა 30 წუთზე მეტია.
მიღებული ცვლილებების თანახმად, ტელე ან რადიოარხზე რეკლამის ან ტელეშოპინგის მოცულობა არ უნდა აღემატებოდეს მაუწყებლის საერთო ხანგრძლივობის 20%-ს, ხოლო დღემდე მოქმედი კანონით რეკლამის ან ტელეშოპინგის მოცულობა დღე-ღამის განმავლობაში არ უნდა აღემატებოდეს მაუწყებლის საერთო ხანგრძლივობის 15%-ს.
