გალის რაიონში არსებული ოპერატიული ვითარება იყო დღეს განხილვის მთავარი თემა სერგეი ბაღაფშის მიერ გამართულ თათბირზე. ინფორმაციას ამის შესახებ აფხაზური მედია ავრცელებს.
აფხაზ სეპარატისტთა ლიდერის მიერ გამართულ თათბირს ბაღაფშის ე.წ. მთავრობის პრემიერი სერგეი შამბა, ე.წ. ძალოვანი მინისტრები და აფხაზეთში მყოფი რუსეთის საოკუპაციო ჯარის წარმომადგენლები ესწრებოდნენ.
"თათბირის მონაწილეებმა აღნიშნეს, რომ საქართველოდან შესული კრიმინალური ჯგუფების საქმიანობის გააქტიურების გამო, მდგომარეობა მოსაზღვრე რაიონში გაუარესდა. თათბირზე განსაკუთრებით აღინიშნა, რომ მკაფიოდ უნდა იქნეს კოორდინირებული რეგიონში ყველა ძალოვანი სტრუქტურის მოქმედება", - იუწყება აფხაზური მხარე.
მათივე ინფორმაციით, ბაღაფშმა თათბირის მონაწილეებს საქართველოდან კონტრაბანდული გზით საქონლის შემოტანის ფაქტების აღკვეთა მოსთხოვა.
"თათბირის მონაწილეებმა განსაკუთრებული ყურადღება დაუთმეს ენგურის მონაკვეთზე სახელმწიფო საზღვრის დაცვის, რეგიონალური ძალოვანი სტრუქტურის საკადრო უზრუნველყოფის, აფხაზეთის მოქალაქეების საქართველოს სამკურნალო დაწესებულებებში მკურნალობის ფაქტებს. თათბირის მონაწილეთა აზრით, საქართველოს სპეცსამსახურები და ხელისუფლება ამ ფაქტებს პროპაგანდისტულ-იდეოლოგიურ მიზნებად იყენებს", - იუწყება აფხაზური მხარე.
