ეკონომიკის სამინისტრო კონგოში მომხდარ ავიაკატასტროფას გამოეხმაურა. ეკონომიკისა და მდგრადი განვითარების მინისტრის მოადგილის გიორგი კარბელაშვილის განცხადებით, აღნიშნული ავიაკატასტროფის საგამოძიებო სამოქალაქო ავიაციის ადმინისტრაცია ჩართულია. კარბელაშვილის განცხადებით, გუშინ საღამოს შეიქმნა მოკვლევის ჯგუფი და გაეროს წარმომადგენლებთან ერთად ერთობლივად განხორციელდება საგამოძიებო ღონისძიებები.
"სამძიმარს ვუცხადებთ დაღუპულ ოჯახებსა და მათ ახლობლებს. გუშინ თბილისის დროით 17: 30 საათზე, კონგოს დემოკრატიულ რესპუბლიკაში, ქალაქ კინსაშაში, კატასტროფა განიცადა გაეროს ეგიდით მფრინავმა "აირზენას" თვითმფრინავმა, რომლის ბორტზე 4 ეკიპაჟის წევრი და 29 მგზავრი იმყოფებოდა. სამწუხაროდ ყველა ადგილზე იქნა გარდაცვლილი. არსებული ინფორმაციით, თვითმფრინავი მოხვდა ტროპიკულ წვიმასა და ქარიშხალში, რამაც გამოიწვია აღნიშნული ტრაგედია. სამოქალაქო ავიაციის ადმინისტრაცია ჩართულია საგამოძიებო საქმიანობაში. გუშინ საღამოს მოკვლევვის ჯგუფი შეიქმნა და გაეროს წარმომადგენლებთან ერთად ერთობლივად განხორციელდება საგამოძიებო ღონისძიებები", - განაცხადა კარბელაშვილმა.
შეგახსენებთ, რომ კონგოში, ავიაკატასტროფის დროს საქართველოს 4 მოქალაქე დაიღუპა. ისინი "აირზენას" თანამშრომლები იყვნენ. ტრაგედიას 22 წლის პილოტი სულიკო ცუცქირიძე, ეკიპაჟის წევრი გურამ კეპულაძე, ტექნიკოსი ალბერტ მანუკოვი და ხომალდის მეთაური ალექსეი ოგანესიანი ემსხვერპლნენ. დაღუპულია ეკიპაჟის ყველა წევრი, ასევე ბორტზე მყოფი 33-ვე ადამიანი, რომელთა შორის 29 გაეროს თანამშრომელი იყო. "აირზენაში" აცხადებენ, რომ თვითმფრინავი CRJ - 100 ტექნიკურად გამართული იყო.
უცხოური მედიის ინფორმაციით, კატასტროფას 1 ადამიანი გადაურჩა, თუმცა მისი ვინაობა უცნობია.
