საქართველოს ციხეებში გარდაცვლილთა საშუალო ასაკი 44 წელია. ამის შესახებ დღეს, პარლამენტში გამართულ ბრიფინგზე "თავისუფალი დემოკრატების" წევრმა, დეპუტატმა გია ცაგარეიშვილმა სახალხო დამცველის 2010 წლის ანგარიშის შეფასებისას განაცხადა.
"სასჯელაღსრულების მინისტრი ხათუნა კალმახელიძე მობრძანდება პარლამენტში და მეუბნება, რომ თურმე პატიმრები საქართველოს ციხეებში ხანდაზმულების გამო კვდებიან. დასკვნაში არის სტატისტიკა გარდაცვლილი პატიმრების ასაკთან დაკავშირებით და ცალსახად მეტყველებს ერთ რამეზე, რომ გარდაცვლილ პატიმართა საშუალო ასაკი 44 წელია", - აღნიშნა ცაგარეიშვილმა.
მისივე თქმით, გასულ წელს პენიტენციალურ დაწესებულებებში 142 გარდაცვლილი პატიმრებიდან მხოლოდ 19 პატიმარი იყო 61 წელს და ზემო ასაკის.
"გარდაცვლილ პატიმრებიდან 32% - ს ასაკი 41-50წლამდეა, 27% კი 31-40 წლამდე. სახალხო დამცველმა თავის დასკვნაში იხმარა ასეთი ტერმინი "სიკვდილის ექსპორტი" და ქართული ციხეებიდან მართლაც "სიკვდილის ექსპორტი" ხორციელდება. რაც ნიშნავს, რომ ყველაფერის აკეთებს სამინისტრო რომ როგორმე "მოიშოროს" მომაკვდავი პატიმარი, გადაიყვანოს იგი სხვა საავადმყოფოებში და ამით შეამციროს სიკვდილიანობის მაჩვენებელი და ეს არის სწორედ "სიკვდილის ექსპორტი", - დასძინა ცაგარეიშვილმა.
მისივე თქმით, ბოლო დროს ქართულ ციხეებში საშინლად არის გაზრდილი ტუბერკულოზით გარდაცვლილი პატიმრების რაოდენობა.
"ეს არის შედეგი ნულოვანი ტოლერანტობის, ამ ადამიანის სიკვდილში ბრალი მიუძღვის მიხეილ სააკაშვილს პირდაპირი მნიშვნელობით", - აღნიშნა ოპოზიციონერმა დეპუტატმა.
ცაგარეიშვილმა ასევე აღნიშნა, რომ ყველა გარდაცვლილ პატიმარს ეტყობა წამებისა და ცემის გარეგნული ნიშნები.
"ყველა ასეთ საქმეზე არის შესაბამის კომპეტენტურ ორგანოებში სისხლის სამართლის საქმეა აღძრული, მაგრამ არავინ არ არის პასუხისგებაში მიცემული. ანგარიშში ასევე მოყვანილი შემზარავი მაგალითი, როდესაც ციხის სამედიცინო დაწესებულებაში ინვალიდის ეტლს მიჯაჭვული პატიმარი სცემა სამედიცინო დაწესებულების უფროსის მოადგილემ", - განაცხადა გია ცაგარეიშვილმა.
შეგახსენებთ, რომ სახალხო დამცველის 2010 წლის ანგარიში პარლამენტში 31 მარტს შემოვიდა.
