სომხური "პეპსი" საქართველოში ექსპორტს გეგმავს. სომხური მედიის ინფორმაციით, ერევანში "პეპსის" ქარხნის მშენებლობა დამამთავრებელ ეტაპზეა. ქარხანა 2011 წლის მაისში გაიხსნება. კომპანიის ბიზნესკონსულტანტის ედგარ კაზარიანის განცხადებით, ქარხანა თავისი ტექნიკური აღჭურვილობით მსოფლიოში ერთ-ერთი საუკეთესო იქნება. მისი თქმით, უკვე განხორციელებულმა ინვესტიციამ 22 მლნ. ევრო შეადინა, თუმცა პროექტის სრული ღირებულების თქმა ამ ეტაპზე ძნელია. მისი ინფორმაციით, კომპანია სხვადასხვა სახის სასმელს გამოუშვებს. მათ შორის ისეთი სახისას, როგორიც საქართველოში არ იწარმოება. შესაბამისად, სომხეთი აღნიშნული სახეობების პროდუქციის საქართველოში ექსპორტს გეგმავს.

შეგახსენებთ, რომ საქართველოში "პეპსის" მწარმოებელი კომპანია "იბერია რეფრეშმენტი" სხვადასხვა დასახელების სასმელს აწარმოებს, მათ შორის არის "პეპსი," "პეპსი მაქსი," "პეპსი ლაითი," "მირინდა," "სევენ აპი," "მაუნტინ დიუ". ასევე სს "იბერია რეფრეშემნტსი" არის PepsiCo -ს სხვა ბრენდების ოფიციალური დისტრიბუტორი: "ლიპტონი" (ცივი ჩაი), "ია" (წვენი) და "ფრუქტოვი სად" (წვენი).

"იბერია რეფრეშმენტსი" საქართველოში 9 სახეობის უალკოჰოლო სასმელს უშვებს და ადგილობრივი ბაზრის გარდა პროდუქციის რეალიზაციას ექსკლუზიური წარმომადგენლის უფლებით სომხეთშიც ახორციელებს.