არასამთავრობო ორგანიზაცია "ახალგაზრდა ფინანსისტთა და ბიზნესმენთა ასოციაცია - "აფბა" მიიჩნევს, რომ ხელისუფლებასთან დაახლოებული ბიზნესმენები, რომლებმაც სამარშრუტო ტაქსების ტენდერში გაიმარჯვეს, მძღოლებს მგზავრობის გადასახადის გაზრდას აიძულებენ.
"აფბაში" აცხადებენ, რომ ხელისუფლება ცდილობს, საზოგადოების მოსალოდნელი პროტესტის შემთხვევაში, გაძვირება მძღოლების ბრალი აღმოჩნდეს.
"სამარშრუტო ტენდერის პირობების გამოქვეყნებისთანავე ვაცხადებდით, რომ მსგავი პირობებით ტენდერის ჩატარება ამ ბაზარზე კონკურენციას შეამცირებდა, შექმნიდა მონოპოლისტს, რაც მგზავრობის ფასის ზრდას გამოიწვევდა. ჯერ კიდევ ტენდერის ჩატარებამდე მოვუწოდებდით მერიას სატენდერო პირობების შეცვლისკენ", _ აცხადებენ აფბაში.
აფბა მიიჩნევს, რომ დღეისათვის დიზელის ბაზარზე არსებული სიტუაცია იმის გამოძახილია, რაც სამარშრუტო ბიზნესში ხდება.
"წარმოუდგენელი ფაქტია, როდესაც დიზელის საწვავი ბენზინზე ძვირი ღირს. დღეს საქართველოში 1 ლიტრი "ევრო დიზელის" ფასი 2,35 ლარია, ხოლო "დიზელ ენერჯი" - 2,20, მაშინ, როდესაც 1 ლიტრი "რეგულარის" ტიპის ბენზინის ფასი 2,15 ლ, ''პრემიუმი" - 2,25, ხოლო "სუპერი" - 2,30 ღირს. ანუ "დიზელ ენერჯი" "რეგულარზე" ძვირია, ხოლო "ევრო დიზელი" "სუპერზე" ძვირი, რაც მსოფლიო მასშტაბით უნიკალური შემთხვევაა", _ აცხადებენ აფბაში.
აფბა მიიჩნევს, რომ ნავთობიმპორტიორი კომპანიები "მარშრუტკების" მძღოლებს მგზავრობის ფასი გაზრდას აიძულებენ. 1-ლი სექტემბრიდან კი როცა თბილისში ახალი სამარშრუტო ტაქსები შემოვა და ბაზარიც რეალურად ახალი მონოპოლისტის ხელში გადავა, ახალ მფლობელს გაძვირებული ტარიფით შეეძლება ოპერირება.
აფბას წევრები შეახსენებენ ეკონომიკის მინისტრ ვერა ქობალიას, რომ პარლამენტში მის მიერ გაკეთებული განცხადების მიუხედავად, საქართველოში მონოპოლიის პრობლემაა.
შეგახსენებთ, 1-ლი აპრილიდან თბილისის მასშტაბით მოძრავ სამარშრუტო ტაქსებზე მგზავრობის ღირებულება 40%-ით გაიზრდება და 50-იდან 70 თეთრამდე მიაღწევს. ამის მიზეზად მძღოლები დიზელის გაძვირებას ასახელებენ.
