დღეს, 28 მარტს, 11:00 საათზე, სასტუმრო "შერატონ მეტეხი პალასში" საქართველოს ეკონომიკისა და მდგრადი განვითარების სამინისტროს, საქართველოს ეროვნული საინვესტიციო სააგენტოს, საქართველოსა და სომხეთში ინდოეთის საელჩოს და საქართველოს დამსაქმებელთა ასოციაციის ორგანიზებით გაიმართება საქართველო-ინდოეთის ბიზნესფორუმი. ღონისძიებას საქართველოს ეკონომიკისა და მდგრადი განვითარების მინისტრი, ვერა ქობალია გახსნის.
ინდოეთის ბიზნესდელეგაციას უხელმძღვანელებს ინდოეთის ელჩი საქართველოსა და სომხეთში, აქალ მალჰოტრა.
ფორუმის მიზანია ქართულ და ინდურ კომპანიებს შორის ინფორმაციის გაცვლა და კონტაქტების დამყარება. ინდოეთის მხრიდან წარმოდგენილი იქნება 20 კომპანია შემდეგი სექტორებიდან: ფარმაცევტიკა, სოფლის მეურნეობა, ტურიზმი, ჯანდაცვა, მშენებლობა და სხვა.
ფორუმის ფარგლებში გაიმართება ორმხრივი შეხვედრები ქართულ და ინდურ კომპანიებს შორის. 29 მარტს კი დაგეგმილია ინდოეთის დელეგაციის ვიზიტი ქართულ კომპანიებში (სექტორების მიხედვით).
