საქართველოს პრეზიდენტმა მიხეილ სააკაშვილმა საქართველოს შს სამინისტროს ოფიცრები ვახტანგ გორგასლის I ხარისხის ორდენებით დააჯილდოვა. პრეზიდენტმა ვახტანგ გორგასლის I ხარისხის ორდენით სამსახურეობრივი მოვალეობის შესრულების დროს გამოვლენილი მამაცობის, თავდადებისა და მხედრული ვალის მოხდისთვის, საქართველოს შს სამინისტროს საგანგებო სიტუაციების მართვის დეპარტამენტის აჭარის ავტონომიური რესპუბლიკის სამაშველო მომზადებისა და რეაგირების მომზადების უფროსი, პოლიციის ვიცე-პოლკოვნიკი დიომიდე კორძაძე (სიკვდილის შემდეგ) დააჯილდოვა.
"დღეს აქ შევიკრიბეთ იმისათვის, რომ კიდევ ერთხელ გავიხსენოთ ჩვენი თანამებრძოლი, პოლიციის ვიცეპოლკოვნიკი დიმა კორძაძე და ის, თუ როგორ მოახერხეთ თქვენ საქართველოს წინააღმდეგ ჩადენილი ტერორისტული აქტის გახსნა, ამ აქტის განმხორციელებლების დაკავება.
მინდა, ყველას სახელით გადაგიხადოთ მადლობა, რათა ის, ვინც ხელი აღმართა საკუთარ სამშობლოზე, მის საუკეთესო წარმომადგენლებზე, ქართველ ხალხზე, დაუსჯელი არ დარჩება", _ განაცხადა საქართველოს პრეზიდენტმა და დასძინა, რომ ოფიცრებმა თავიანთი ქმედებებით ყველას აჩვენეს, რომ საქართველო შემდგარი სახელმწიფოა, რომელსაც შეუძლია საკუთარი თავისა და შვილების დაცვა.
"ჩემთვის განსაკუთრებული პატივია გაგაცნოთ განკარგულება, დიომიდე კორძაძის ვახტანგ გორგასლის I ხარისხის ორდენით დაჯილდოების შესახებ.
სამსახურეობრივი მოვალეობის შესრულების დროს გამოვლენილი მამაცობის, თავდადებისა და მხედრული ვალის მოხდისთვის, საქართველოს შს სამინისტროს საგანგებო სიტუაციების მართვის დეპარტამენტის აჭარის ავტონომიური რესპუბლიკის სამაშველო მომზადებისა და რეაგირების მომზადების უფროსი, პოლიციის ვიცე-პოლკოვნიკი დიომიდე კორძაძე დაჯილდოვდეს (სიკვდილის შემდეგ) ვახტანგ გორგასლის I ხარისიხის ორდენით (ჯილდო გადაეცა მის მეუღლეს რუსუდან მუთიძეს)", _ განაცხადა მიხეილ სააკაშვილმა.
მისი თქმით, ამ აქტის ყველა შემსრულებელი დაკავებულია, თუმცა ყველა ორგანიზატორი დაკავებული არ არის - ისინი საერთაშორისო ძებნაში იმყოფებიან და ჩვენი ინფორმაციით, უცხო ქვეყნის უსაფრთხოების სტრუქტურებში მსახურობენ. მაგრამ მოვა დრო და სახელმწიფოს მიერ დასპონსორებული ტერორიზმისთვის მათაც მოეკითხებათ პასუხი და მათ "პატრონებსაც".
