პოლონეთი და საქართველო სტატისტიკის სფეროში თანამშრომლობას იწყებენ. "საქსტატის", ინფორმაციით, პოლონეთის რესპუბლიკის საგარეო საქმეთა სამინისტროს პროგრამის _ "პოლონეთის დახმარება 2011"-ის ფარგლებში, საქართველოს სტატისტიკის ეროვნულ სამსახურსა და პოლონეთის სტატისტიკურ სამსახურს შორის თანამშრომლობა იწყება.
როგორც "ჯი-ეიჩ-ენს" საქსტატიდან აცნობეს, თანამშრომლობის მიზანია საქართველოს რეგიონული ანგარიშების განვითარება და მისი მეთოდოლოგიური სრულყოფა. ამ მიზნით პოლონეთის მთავრობამ 210 753 პოლონური ზლოტი გამოყო.
პროგრამის ფარგლებში "საქსტატის" ეროვნული ანგარიშების სამმართველოში განხორციელდება პოლონელი ექსპერტების სამუშაო ვიზიტი, რომლებიც ქართველ კოლეგებს გააცნობენ რეგიონული ანგარიშების წარმოების ევროპულ მეთოდოლოგიას.
პროექტის განხორციელების შედეგად საქართველოს რეგიონული ანგარიშები დააკმაყოფილებს ევროკავშირის სტანდარტებს, ასევე გაუმჯობესდება რეგიონებიდან საწყისი მონაცემების შეგროვების მეთოდები და ხარისხი, რაც მნიშვნელოვანია ეროვნული ანგარიშების წარმოების ხარისხის ასამაღლებლად.