პროექტი "აქსის პალასი საირმეზე" თიბისი ბანკის მიერ 2 მილიონ 200 ათასი აშშ დოლარით დაფინანსდა. მშენებლობა 2011 წლის 15 აპრილს დაიწყება და 18 თვეში დასრულდება.
პროექტი ითვალისწინებს 23-სართულიანი საცხოვრებელი სახლის, მისი გარემოსა და დამატებითი სერვისების შექმნას. საცხოვრებელი ბინების გარდა, აღნიშნული პროექტი მოიცავს კომერციულ ფართებს. სრულ კომპლექსში გათვალისწინებულია საცურაო აუზის, სათამაშო მოედნისა და spa-ცენტრის შექმნა.
მსურველებს "აქსის პალასში საირმეზე" უძრავი ქონების შეძენა თიბისი ბანკის საბანკო გარანტიით შეეძლებათ - ამით ბანკი იღებს პასუხისმგებლობას, აქსისის მიერ ყველა ახალი მყიდველის წინაშე აღებული ვალდებულების შესრულებაზე.
გარდა ამისა, უკვე არსებულ კლიენტებს, ვისაც ბინის ღირებულების ნაწილი აქვთ დაფარული, დარჩენილ ღირებულებას თიბისი ბანკი იპოთეკური სესხით დაუფინანსებს, რომელიც მხოლოდ შეძენილი ბინის უზრუნველყოფით გაიცემა. რაც შეეხება ახალ კლიენტებს, საბანკი გარანტიასთან ერთად, თიბისი მათ იპოთეკურ სესხებზე სპეციალურ შეთავაზებებს გაუკეთებს.
"თიბისი ბანკსა და აქსისს შორის მიღწეული შეთანხმება და ამ სქემით განხორციელებული პროექტი ძალიან მნიშვნელოვანია არა მარტო კომპანიებისა და მომხმარებლისთვის, არამედ დარგისთვის და, აქედან გამომდინარე, ქვეყნის ეკონომიკისთვისაც. ესაა ნათელი მაგალითი, რომ კრიზისის შემდეგ სამშენებლო სექტორი გადადის ახალ სისტემაზე და დეველოპერი მომხმარებელს ბანკის მიერ დაფინანსებულ პროექტს წარუდგენს. აქსისის ყველა პროექტი კომერციულად მომგებიანი და ჯანსაღია და სწორედ ამიტომ განხორციელდება წარმატებით", _ აცხადებს აქსისის გენერალური დირექტორი გიორგი კაპანაძე.
"თიბისი ბანკისთვის ეს პროექტი საინტერესოა იმით, რომ აქვს საკმაოდ კარგი ფინანსური მაჩვენებლები და გამართული მენეჯმენტი. ამასთან, ეს პირველი პრეცედენტია, როდესაც ბინის მყიდველებზე გავცემთ საბანკო გარანტიას, რაც, მიგვაჩნია, რომ პროექტის წარმატების მნიშვნელოვანი წინაპირობა იქნება. "აქსისი პალასი საირმეზე" იმითაც არის მნიშვნელოვანი, რომ ეს არის ერთ-ერთი პირველი პროექტი, რომელიც კრიზისის შემდეგ, "ძველი თბილისის ახალი სიცოცხლის" პროგრამის ფარგლებს მიღმა, დამოუკიდებლად ფინანსდება ბანკის მიერ, რაც ზოგადად ამ დარგში დადებით ტენდენციაზეც მიანიშნებს", - აღნიშნავს თიბისი ბანკის უფროსი კორპორატიული ბანკირი, პავლე ზაკალაშვილი.
აქსისსა და თიბისი ბანკს შორის მოლაპარაკება სხვა პროექტების დაფინანსებაზედაც მიმდინარეობს.
