"ქრისტიან-დემოკრატები" რეგიონალური განვითარებისა და ინფრასტრუქტურის მინისტრს კონფლიქტის ზონასთან მდებარე სოფლებისთვის სარწყავი წყლის მიწოდების საკითხის მოგვარებას სთხოვენ. ამის შესახებ "ქრისტიან-დემოკრატების" ლიდერმა გიორგი თარგამაძემ პარლამენტის რიგგარეშე პლენარულ სხდომაზე რეგიონალური განვითარებისა და ინფრასტრუქტურის მინისტრის გამოსვლის შემდეგ განაცხადა.
"კონფლიქტურ ზონაში, კერძოდ კი ნიქოზში, ქვემო ხვითში, მეჯვრისხევში, დიცში საგაზაფხულო სამუშაო უნდა დაიწყოს, სეპარატისტები კი სარწყავად წყალს არ აძლევენ. რას აკეთებს ინფრასტრუქტურის მინისტრი და უნდა ჰქონდეს თუ არა ამ ხალხს იმედი, რომ წინა წელთან შედარებით უკეთესი მდგომარეობა ექნებათ", - მიმართა თარგამაძემ რამაზ ნიკოლეიშვილს.
დეპუტატი დაინტერესდა, რა გეგმები აქვს სამინისტროს ბუნებრივი კატაკლიზმების პრევენციის კუთხით და რატომ არის ბიუჯეტში აღნიშნულისთვის მცირე თანხები გამოყოფილი, მაშინ, როცა ბუნებრივი კატაკლიზმების გამო ქვეყანაში 11 ათასი საცხოვრებელი სახლია დაზიანებული და სტიქიის განმეორების შემთხვევაში იქ მცხოვრებ მოსახლეობას საფრთხე ექმნება.