ნავთობპროდუქტების იმპორტიორთა კავშირის ინფორმაციით, მსოფლიოში ნავთობის ფასი კვლავინდებურად იზრდება.
"ბოლო 1 კვირის განმავლობაში ნავთობის ფასი გაზრდილია თითქმის 7 დოლარით ბარელზე. აღსანიშნავია, რომ მარტის თვეში იაპონიაში მომხდარი ტრაგედიის შემდეგ ნავთობის ფასი 1 დღეში თითქმის 4 პროცენტით დაეცა, მაგრამ შემდეგ პოზიციები კვლავ დაიბრუნა და 5.6 პროცენტით გაიზარდა", - აცხადებენ ნავთობპროდუქტების იმპორტიორთა კავშირში.
22 მარტის ვაჭრობის შედეგებით მსოფლიოს წამყვან ლონდონისა და ნიუ-იორკის სანავთობო ბირჟებზე ნავთობის ფასმა შეადგინა: ლონდონში InterContinental Exchange Futures Europe-ზე (IСE Futures Europe) - Brent ტიპის ნავთობის ფასმა - 115.70 დოლარი/ბარელზე; ნიუ-იორკში New York Mercantile Exchange-ზე (NYMEX) - Light Sweet ტიპის ნავთობის ფასმა - 104.00 დოლარი ბარელზე.
მათივე ინფორმაციით, ნავთობის მაღალი ფასი განპირობებულია ჩრდილოეთ აფრიკასა და ახლო აღმოსავლეთში (კერძოდ, ლიბია და იემენი) განვითარებული მოვლენებით. კერძოდ, ლიბიაში ნავთობის მოპოვება და ექსპორტი შემცირებულია თითქმის 1 მლნ ბარელით დღე-ღამეში. სამწუხაროდ, საუდის არაბეთმა მის მიერ გაკეთებული განცხადებების მიუხედავად, ამის კომპენსირება დღემდე ვერ მოახერხა.
"იაპონიის კრიზისმა ვერავითარი გავლენა ვერ მოახდინა ნავთობის მოხმარებაზე. შესაბამისად, დაძაბული ვითარების გამო, რომელსაც ჯერჯერობით ბოლო არ უჩანს, ახლო პერსპექტივაში ნავთობის ფასების ვარდნა არ არის მოსალოდნელი", _ განარტავენ კავშირში და აღნიშნავენ, რომ რაც შეეხება საერთაშორისო ფასებს Platt's-ის მიხედვით, რომლითაც ხორციელდება საქართველოში საწვავის იმპორტი, მნიშვნელოვნადაა გაზრდილი ბენზინისა და დიზელის საწვავის საერთაშორისო ფასები. კერძოდ, ბენზინის ფასი 1000 დოლარიან ნიშნულზე დგას ტონაზე, ხოლო დიზელის საწვავის ფასი შეადგენს 970 დოლარს/ტონაზე.
