შავი ზღვის აკვატორიაში ნავთობგადამამუშავებელი საწარმოს მშენებლობასთან დაკავშირებით ტექნიკურ-ეკონომიკურ დასაბუთებაზე მუშაობა უკვე დაწყებულია.
ამის შესახებ დღეს, პარლამენტში, სამთავრობო დებატების მიმდინარეობისას ენერგეტიკის მინისტრმა ალექსანდრე ხეთაგურმა განაცხადა.
მისივე განმარტებით, ნავთობგადამამუშავებელი საწარმო არა მხოლოდ ადგილობრივ ბაზარზე, არამედ იმპორტზეც იქნება გათვლილი.
"საუბარია 4,5 მლნ. ტონიანი ნავთობგადამამუშავებელი საწარმოს მშენებლობაზე, რომელიც ყველანაირ პროდუქტს გამოუშვებს. რეგიონში დიდი რაოდენობით ნავთობი არსებობს და საჭიროა მისი დროული გადამუშავება... ვფიქრობთ, რომ ჩვენთან გადამუშავებული ნავთობპროდუქტებით თურქეთის და უკრაინის ბაზრებზე შევალთ", - განმარტა ხეთაგურმა, რომლის ინფორმაციითაც, ქვეყანა დღეს 800 ათას ტონა ნავთობპროდუქტს მოიხმარს.
გარდა ამისა, მინისტრმა ახალი მილსადენების მშენებლობასა და ძველების რეაბილიტაციაზეც გააკეთა განცხადება და აღნიშნა, რომ შესაბამისი პროცესები 2013 წლამდე დასრულდება.
"ამ მიმართულებით 353 მლნ. ლარზე მეტი ინვესტიცია განხორციელდება", - დასძინა ალექსანდრე ხეთაგურმა.
