პოლიტოლოგ გოგი ხუციშვილის აზრით, ვაჭრობის მსოფლიო ორგანიზაციაში რუსეთის გაწევიანების თანხმობის სანაცვლოდ მოსკოვისგან "რაიმე დათმობის" იმედი არ უნდა გვქონდეს.
"დიდი მოლოდინი, რომ საქართველოს მხრიდან რუსეთის ვმო-ში გაწევრიანების თანხმობის, ან ხელშეწყობის ნაცვლად მოსკოვისგან დათმობებს მივიღებთ, არ უნდა გვქონდეს. ჩვენ არ ვართ იმ მომგებიან პოზიციაში, რომ მას ჩვენი პირობები ვუკარნახოთ, მაგრამ შესაძლებელია, რომ ეს საკითხი გამოვიყენოთ საქართველოსა და რუსეთს შორის მოლაპარაკებათა ფორმატის გასააქტიურებლად. თორემ ის, რომ ვაჭრობის მსოფლიო ორგანიზაციაში გაწევრიანების შემთხვევაში მოსკოვი ისეთ კარდინალურ საკითხებზე წავა დათმობებზე, როგორიც დეოკუპაცია და კონფლიქტის ზონებია, მოსალოდნელი, რა თქმა უნდა, არ არის", - განუცხადა ხუციშვილმა "ჯი-ეიჩ-ენს".
მეტიც, პოლიტოლოგის განმარტებით, თბილისსა და მოსკოვს შორის ურთიერთობის დალაგებამდე ქვეყნებს შორის ვაჭრობაც კი ნაკლებადშესაძლებელია განვითარდეს.
"ლაპარაკია იმაზე, რომ რუსეთის ვმო-ში გაწევრიანების თანხმობის ნაცვლად საქართველომ ჩვენი პროდუქციისთვის რუსეთის ბაზრის გახსნა მოითხოვოს. ჩემი აზრით, როცა ურთიერთობაში საერთო ფონი დაძაბულია, ვაჭრობის განვითარება ნაკლებმოსალოდნელია. ფართომასშტაბიან ვაჭრობაზე მას შემდეგ შეგვიძლია ვიფიქროთ, რაც ურთიერთობა დალაგდება, მანამდე არა", - აღნიშნა პოლიტოლოგმა.
შეგახსენებთ, რომ თბილისსა და მოსკოვს შორის რუსეთის ვაჭრობის მსოფლიო ორგანიზაციაში გაწევრიანების საკითხზე მოლაპარაკებები იწყება. მოლაპარაკებათა პირველი რაუნდი ხვალ, 9 მარტს, ბერნში გაიმართება.
