"გაზპრომის" ხელმძღვანელობა ჰოლდინგის მმართველს ალექსეი მილერს შრომით ხელშეკრულებას 5 წლის ვადით უგრძელებს. ინფორმაციას ამის შესახებ რუსული მედია ავრცელებს. მათი ინფორმაციით, საბოლოო გადაწყვეტილება ამასთან დაკავშირებით 22 მარტს "გაზპრომის" დირექტორთა საბჭოს შეკრებაზე იქნება მიღებული.
მილერი "გაზპრომს" 2001 წლიდან ხელმძღვანელობს და ბოლო ათი წლის განმავლობაში არაერთგზის გავრცელებულა ინფორმაცია მისი გადადგომის შესახებ. ბოლოს ამგვარი ინფორმაცია რუსულმა მედიამ 2010 წლის ნოემბრის ბოლოს გაავრცელა.
2010 წლის ოქტომბერში მილერმა დაიკავა მოწინავე ადგილი რუსეთის ყველაზე გავლენიან ბიზნესმენთა ნუსხაში. რეიტინგში მან გაუსწრო "რუსეთის რკინიგზის" ხელმძღვანელს ვლადიმერ იაკუნინს და ჰოლდინგ "ბაზოვი ელემენტის" ხელმძღვანელს ოლეგ დერიპასკას.
რამდენიმე ხნით ადრე რუსეთის პრეზიდენტის თანაშემწემ ალექსანდრე დვორკოვიჩმა გააკეთა განცხადება იმის შესახებ, რომ ხელისუფლება არ აპირებს "გაზპრომის" მმართველობის შეცვლას. გარდა მილერისა, სახელმწიფოს ინტერესებს "გაზპრომში" წარმოადგენს რუსეთის ფედერაციის პირველი ვიცე-პრემიერი ვიქტორ ზუბკოვი, ეკონომიკური განვითარების მინისტრი ელვირა ნაიბულინა, ენერგეტიკის მინისტრი სერგეი შმატკო, პრეზიდენტის სპეციალური წარმომადგენელი საერთაშორისო ენერგეტიკული თანამშრომლობის საკითხებში იგორ იუსუპოვი და ქონების სამინისტროს ყოფილი ხელმძღვანელი ფარიდ გაზიზულინი.
მილერი 1962 წელს პეტერბურგში დაიბადა. 1984 წელს დაამთავრა ვოზნესენსკის სახელობის ფინანსურ-ეკონომიკური ინსტიტუტი. 1990 წლამდე იყო საცხოვრებელ-სამოქალაქო სამეცნიერო-კვლევითი და საპროექტო ინსტიტუტის "ლენნიიპროეტის" თანამშრომელი იყო. შემდეგ მილერმა მერიაში საგარეო კავშირების კომიტეტში თანამდებობა მიიღო. 2000 წელს კი "გაზპრომის" ხელმძღვანელის თანამდებობის მიღებამდე ერთი წლით ადრე მილერი რუსეთის ფედერაციის ენერგეტიკის მინისtრის მოადგილე გახდა.