პოლიტოლოგ გოგი ხუციშვილის აზრით, საქართველოში ახალი საპროტესტო ტალღის აგორება "მოსალოდნელი კი არა, მოსალოდნელზე მეტია".
"თუ არ წავიდა ხელისუფლება დათმობებზე და არ მოხდა საარჩევნო გარემოს გაჯანსაღება, არ შემსუბუქდა, ოდნავ მაინც, მოსახლეობის მძიმე სოციალური მდგომარეობა, მოსალოდნელი კი არა, მოსალოდნელზე მეტია, რომ ხალხი გავიდეს ქუჩაში", - განუცხადა ხუციშვილმა "ჯი-ეიჩ-ენს".
თუმცა, პოლიტოლოგის აზრით, "ყველაფერი სხვადასხვა ფაქტორის ჯამურ შედეგზე იქნება დამოკიდებული".
"ყველაფერი იქნება დამოკიდებული იმაზე, რამდენად ააწყობს ოპოზიციური ძალები მუშაობას ხალხთან და რამდენად მაღალი იქნება მოსახლეობაში საპროტესტო მუხტი. ცალ-ცალკე ვერ ერთი - ვერც ხალხის აქტივობა, ვერც მათი უკმაყოფილება, რომელიც მათში არსებობდეს, ვერც ოპოზიცური ძალები, ვერ განაპირობებენ ცვლილებეს. ეს ჯამური შედეგით უნდა მივიღოთ", - განმარტა ხუციშვილმა.
ამასთან, მისივე აზრით, დღევანდელი გადასახედიდან ნაკლებ სავარაუდოა, რომ რომელიმე ოპოზიციურმა ძალამ მაღალი დონის საპროტესტო მოძრაობის ორგანიზება შესძლოს, თუმცა არ გამორიცხავს, რომ "ეს შეიძლება შეიცვალოს".
შეგახსენებთ, რომ მმართველი პარტია ოპოზიციური ე.წ. რვიანის შეთავაზებულ წინადადებებზე "პასუხების გაცემას" 9 მარტიდან დაიწყებს.
