პარლამენტი სახელმწიფო ბიუჯეტში ცვლილების განხილვას იწყებს.
როგორც დღეს, ბიუროს სხდომაზე პარლამენტის თავმჯდომარემ დავით ბაქრაძემ აღნიშნა, მთავრობისგან პარლამენტში შევიდა სახელმწიფო ბიუჯეტში ცვლილების შესახებ კანონპროექტი.
"კონკრეტულ შემთხვევაში ბიუჯეტში ცვლილების შეტანა არ არის დაკავშირებული ფინასური პარამეტრების ცვლილებასთან, მაგრამ ნებისმიერ შემთხვევაში ოპოზიციის მხრიდან იყო კითხვები და იმედი მაქვს, რომ ბიუჯეტში შესატანი ცვლილებების განხილვაში ოპოზიციური ფრაქციები და საპარლამენტო უმცირესობაც ჩაერთვება", - აღნიშნა ბაქრაძემ.
აღნიშნულთან დაკავშირებით, პარლამენტის საფინანსო-საბიუჯეტოს კომიტეტის თავმჯდომარის ზურაბ მელიქიშვილის თქმით, ბიუჯეტში ცვლილების შესახებ გრაფიკი შედგენილია და განხილვები მიმდინარე კვირას განიხილება.
"შესაბამის კომიტეტებს დაურიგდებათ ბიუჯეტში შესატანი ცვლილებების განხილვის გრაფიკი და თუ საჭირო იქნება ფრაქციებსაც შეეძლებათ განხილვები მოაწყონ", - აღნიშნა მელიქიშვილმა.
მისივე განმარტებით, სახელმწიფო ბიუჯეტში ცვლილებების შეტანა გარემოს დაცვის სამინისტროს სტრუქტურულმა რეორგანიზაციამ გამოიწვია.
