"კონსერვატიული პარტიის" ლიდერი ზვიად ძიძიგური ხელისუფლებას საარჩევნო გარემოს გაუმჯობესების თაობაზე ოპოზიციის მიერ შეთავაზებული წინადადებების იგნორირების შემთხვევაში "მთელი მსოფლიოს წინაშე პასუხისმგებლობით" ემუქრება.
"საზოგადოებამ უნდა იცოდეს, რამდენად არასერიოზულად და არაარგუმენტირებულად ცდილობს ხელისუფლება თავიდან აირიდოს საარჩევნო კოდექსის გასაუმჯობესებლად მიმართული ღონისძიებების შესრულება. მას, რეალურად, ეშინია სამართლიანი არჩევნების. ჩვენ ასეთი განცდა გვრჩება", - განუცხადა ძიძიგურმა "ჯი-ეიჩ-ენს" დღეს, სასტუმრო "ჰოლიდეიში", სადაც ოპოზიციურმა ე.წ. რვიანმა ელექტრონული პირადობის მოწმობის თვითღირებულების გაანგარიშების შესახებ ხელისუფლების ანალიზის პრეზენტაცია გამართა და მმართველი პარტია "ხარჯების გაბერვაში" დაადანაშაულა.
რაც შეეხება იმას, თუ მოვლენების რა სავარაუდო სცენარით განვითარებას შეიძლება ველოდოთ, თუკი ხელისუფლება საარჩევნო გარემოს გაუმჯობესების მიზნით მიმდინარე მოლაპარაკებების პროცესში ოპოზიციის მიერ შეთავაზებულ წინადადებებს არ გაითვალისწინებს, ძიძიგური განმარტავს, რომ "ასეთ შემთხვევაში ხელისუფლება პასუხს მსოფლიოს წინაშე აგებს".
"თუ არ წამოვა ხელისუფლება ჩვენს წინადადებებზე, დავჯდებით და ისევ რვიანის ფორმატში მოვილაპარაკებთ, როგორი იქნება ჩვენი ქმედები. მინდა გითხრათ, რომ მას მთელი მსოფლიოს წინაშე მოუწევს ჯერ პასუხისგაცემა იმაზე, თუ რატომ არ მოდის ჩვენს წინადადებებზე, შემდეგ კი პასუხისგება", - განმარტა ძიძიგურმა.
აღსანიშნავია, რომ მმართველი პარტია ოპოზიციური ე.წ. რვიანის შეთავაზებულ წინადადებებზე "პასუხების გაცემას" 9 მარტიდან დაიწყებს.
