მთავრობა "საავიაციო უშიშროების უზრუნველყოფის ეროვნული კომიტეტს" ქმნის, რომლის დაკონპლექტებაც ერთ თვეში დასრულდება.
უკვე ცნობილია, რომ კომიტეტის შემადგენლობაში ეკონომიკისა და მდგრადი განვითარების, ფინანსთა, შინაგან საქმეთა, თავდაცვის, იუსტიციისა და საგარეო საქმეთა სამინისტროების წარმომადგენლები შევლენ.
მთავრობაში განმარტავენ, რომ აღნიშნული კომიტეტის შექმნა განპირობებულია იმ გარემოებით, რომ საავიაცო უშიშროების უზრუნველყოფა არ წარმოადგენს მხოლოდ ერთი უწყების კომპეტენციას და მასში, თავიანთი უფლებამოსილებების ფარგლებში, რამდენიმე უწყება მონაწილეობს. შესაბამისად, ეროვნული კომიტეტის ფუნქცია იქნება აღნიშნული უწყებების კოორდინირებული და ოპერატიული თანამშრომლობის უზრუნველყოფა საავიაციო უშიშროების სფეროში და სათანადო ნორმატიული ბაზის სრულყოფასა და შესრულებაზე მონიტორინგი.
იმავდროულად, კომიტეტის შექმნას ითხოვენ საერთაშორისო
ორგანიზაციებიც (ICAO, ECAC).
"საერთაშორისო სამოქალაქო ავიაციის შესახებ" ჩიკაგოს 1944 წლის
კონვენციის მე-17 დანართით, საქართველოს ტერიტორიაზე, საერთაშორისო სტანდარტებისა და რეკომენდებული პრაქტიკის შესრულების კოორდინირებას სწორედ "საავიაციო უშიშროების უზრუნველყოფის ეროვნული კომიტეტი" განახორციელებს.
კომიტეტის პრეროგატივა იქნება ასევე მართლსაწინააღმდეგო ქმედობისაგან სამოქალაქო ავიაციის უშიშროების დაცვის უზრუნველყოფის სახელმწიფო პროგრამის სრულყოფა და მათი პრაქტიკაში დანერგვაც.
კომიტეტი უფლებამოსილია ასევე შეიმუშაოს წინადადებები აეროპორტებსა და მათ მიმდებარე ტერიტორიაზე საავიაციო უშიშროების დამატებითი ზომების შემოღების შესახებ, მათ შორის, აეროპორტის დაპროექტების/მშენებლობის სტადიაზე;
კომიტეტის სხდომა გაიმარტება საჭიროებისამებრ, თუმც წელიწადში მინიმუმ ორჯერ.
