სახელმწიფო საექსპორტო პროდუქციაზე ჰოლოგრამებს აუქმებს. "ვაზისა და ღვინის შესახებ" კანონში შესატანი ცვლილებების თანახმად, ადგილწარმოშობის საექსპორტო ღვინოებზე ჰოლოგრამის გამოყენება სავალდებულო აღარ იქნება.
"სამტრესტში" განმარტავენ, რომ კანონპროექტის შემუშავება განპირობს იმან, რომ ჰოლოგრამების გამოყენების პროცესში გარკვეული უარყოფითი ტენდენციები გამოიკვეთა, რომლებიც ქართული ღვინის ექსპორტზე ნეგატიურად აისახა. კერძოდ, ღვინის მწარმოებლებისა და ექსპორტიორების ინფორმაციით, ჰოლოგრამების შემოღებამ განაპირობა არაჰოლოგრამიანი (მაგრამ ხარისხიანი) პროდუქციის რეალიზაციის შეფერხება, ვინაიდან მომხმარებლის მიერ უპირატესობა მხოლოდ ჰოლოგრამიან პროდუქციას მიენიჭა, რამაც თავის მხრივ შესაძლოა ქართული ღვინის ექსპორტს პრობლემა შეუქმნას.
"სამტრესტში" აცხადებენ, რომ საკანონმდებლო ინიციატივა ქართული ღვინის მწარმოებელი კომპანიებისათვის საერთაშორისო ბაზარზე თანაბარი პირობების შექმნისათვის მომზადდა.
