2026 წლის სახელმწიფო ბიუჯეტში შესატანი ცვლილებების თანახმად, ჯარიმებისა და საურავებისგან მისაღები თანხების პროგნოზირებული მოცულობა 25%-ით, 200-დან 250 მლნ ლარამდე იზრდება , - ამის შესახებ „ძლიერი საქართველო - ლელოს” აღმასრულებელმა მდივანმა, თაზო დათუნაშვილმა ბრიფინგზე განაცხადა.
მისივე თქმით, საქართველოს 300 ათასამდე მოქალაქეს 1200 ლარზე ნაკლები ხელფასი აქვს.
"მინდა გამოვეხმაურო იმ უმძიმეს შემთხვევას, რომელიც ქვემო ფონიჭალაში ახლახან მოხდა. ჩვენი ყველას ლოცვა და ფიქრი მიმართულია დაშავებულების გადარჩენისაკენ და მინდა ყველას გადარჩენა და ჯანმრთელობა ვუსურვო. ეს შემთხვევა კიდევ ერთი გამოვლინებაა იმ დიდი ტრაგედიისა, რომელშიც ჩვენი ქვეყანა ყოველდღიურად ცხოვრობს.
საკონსტიტუციო სასამართლოში პარტიების აკრძალვის პროცესის ფონზე, "ქართული ოცნება" ჯარიმებით საქართველოს მოქალაქეების ძარცვას აგრძელებს და ახალ სიმაღლეზე აჰყავს.
2026 წლის სახელმწიფო ბიუჯეტში შესატანი ცვლილებების თანახმად, ჯარიმებისა და საურავებისგან მისაღები თანხების პროგნოზირებული მოცულობა 25%-ით, 200-დან 250 მლნ ლარამდე იზრდება.
აღსანიშნავია, რომ ამ მოცულობის თანხა ჯარიმებიდან საქართველოს ბიუჯეტში არასდროს შესულა. ეს 2022 წლის მაჩვენებელზე თითქმის ორჯერ მეტია.
ივანიშვილის რეჟიმმა საქართველო აქცია ქვეყნად, საიდანაც ბოლო 10 წელიწადში ასობით ათასი ჩვენი მოქალაქე გაექცა:
დაბალ ანაზღაურებას;
ყოველთვიურად გაძვირებულ ფასებს სურსათსა და მედიკამენტებზე;
უკვე მიუწვდომელ საწვავის ფასს და კომუნალურ გადასახადებს;
ზღვარგადასულ საბანკო პროცენტებს;
აწ უკვე გიჟურად გაძვირებულ სახელმწიფო ჯარიმებს.
საქსტატის მონაცემებით, მედიანური ხელფასი მხოლოდ 1500 ლარია. საქართველოს 300 ათასამდე მოქალაქეს 1200 ლარზე ნაკლები ხელფასი აქვს.
რეკორდულად არის გაძვირებული დიზელი და ბენზინი, რასაც საქართველოს ხელისუფლება აქციზის და დღგ-ს დროებითი შემცირებით არ პასუხობს, რაც მყისიერად 1 ლარზე მეტით შეამცირებს საწვავის ფასს.
კორუფციის ბრალდებით ციხეშია თითქმის მთელი მთავრობა - ყოფილი პრემიერი, თავდაცვის მინისტრი, "სუსის" უფროსი, რომლებსაც სახლში მილიონობით ლარი და ოქროს ზოდები უპოვეს.
რამდენიმე დღის წინ გაირკვა, რომ მეტროს ვაგონების 27 ტენდერიდან მოპარულია 41 მილიონი ლარი. ნაცვლად იმისა, რომ კალაძე მუნიციპალურ პარკინგებს აშენებდეს და პრობლემას წყვეტდეს, ორიენტირებულია ჯარიმების გამოწერაზე და მოქალაქეების ჯიბიდან ფულის ამოღებაზე. ბიუჯეტში გაზრდილი პროგნოზი ნიშნავს, რომ სახელმწიფო აპირებს ამ ოდენობით თანხის ამოღების დაორგანიზებას ყველაფრის ფასად.
როდესაც შენ გიზრდიან გადასახადებსა და ჯარიმებს, ამ დროს რეკორდული, 88 მილიარდი ლარის ბრუნვა აქვს აზარტული თამაშების ბიზნესს, რომელიც ოჯახებს ანგრევს და გადასახადების ზრდის ნაცვლად, მას შეღავათებს უწესებენ.
რეკორდულად არის შემცირებული შობადობა. დაბადებულთა რაოდენობას გარდაცვლილთა რაოდენობა უკვე 6 წელია აჭარბებს!
სამუშაო ადგილების შექმნის, უცხოური ინვესტიციის მოზიდვის და კეთილდღეობის ზრდის ნაცვლად, "ქართულმა ოცნებამ" საქართველო ჯარიმების, სანქციების, რეპრესიების და მოსახლეობის ტანჯვის ხარჯზე ბიუჯეტის შევსების ქვეყნად აქცია! ასე იწრთობა ივანიშვილის კლანის პირადი ქონება და ასე ინგრევა საქართველო, როგორც სუვერენული სახელმწიფო!" - განაცხადა თაზო დათუნაშვილმა.