ერაყის ჩრდილოეთით, ერბილის პროვინციაში, ხუთშაბათს საღამოს, სულ მცირე, ორი კამიკაძე დრონი ირანელი ქურთების ოპოზიციური დაჯგუფების ბაზას დაესხა თავს, რის შედეგადაც ობიექტზე მასშტაბური ხანძარი გაჩნდა. ინფორმაციას გამოცემა The New Region ავრცელებს.
ქურთისტანის რეგიონის ანტიტერორისტული სამმართველოს ცნობით, ადგილობრივი დროით დაახლოებით 22:19 საათზე დრონებმა ჰაბატის რაიონის სოფელ ტოპზავაში, ერბილის დასავლეთით, ირანული ქურთული ოპოზიციური ორგანიზაციის - ირანის ქურთისტანის ბრძოლის ორგანიზაციის (Khabat) სამოქალაქო ბანაკს დაარტყეს.
შემთხვევის ადგილზე მალევე მივიდნენ სამოქალაქო თავდაცვის დანაყოფები და უსაფრთხოების ძალები, რომლებმაც მასშტაბური ხანძრის ჩაქრობა შეძლეს.
ადგილობრივი ხელისუფლების ინფორმაციით, თავდასხმის შედეგად არავინ დაშავებულა.
თავდასხმის მომენტში ბაზაზე ირანის ქურთისტანის ბრძოლის ორგანიზაციის („ხაბატის“) წევრები არ იმყოფებოდნენ. ობიექტზე მხოლოდ უსაფრთხოების სამსახურის რამდენიმე თანამშრომელი იყო, რომლებიც მის დაცვას უზრუნველყოფდნენ.
